Aýǵanstanda tamaqty toiyp ishpeitinder sany rekordtyq kórsetkishke jetti, dep habarlaidy QazAqparat BUU Jańalyqtar qyzmetine silteme jasap.
Qaqtyǵystar, ekonomikalyq kúizelister, tabiǵi apattar, saiasi turaqsyzdyq, sondai-aq gýmanitarlyq kómek jetkizýdegi qiyndyqtar planetanyń ártúrli núktelerindegi azyq-túlik daǵdarysyn kúsheitýde. BUU mekemeleri olardyń 20-yn anyqtady.
Dúniejúzilik azyq-túlik baǵdarlamasy (DAB) men Azyq-túlik jáne aýyl sharýashylyǵy uiymy (AAU) daiyndaǵan baiandama avtorlary Efiopiia, Nigeriia, Ońtústik Sýdan jáne Iemen elderindegi jaǵdaiǵa alańdaýshylyq tanytqan. Osy tórt eldiń turǵyndary besinshi deńgeidegi azyq-túlik daǵdarysyn bastan ótkerýde. Bul degenimiz olardyń basym bóligi ashtyqtan kóz jumýy múmkin.
Zertteý asharshylyq pen qaqtyǵystyń bailanysyn taǵy bir ret dáleldedi. Asharshylyq aldynda turǵan adamdar - áskeri qaqtyǵystar saldarynan óz úilerin tastap ketýge májbúr bolǵandar. Olar baspanasyz, jalaqysyz qalǵandar.
Azyq-túlikke bailanysty jaǵdai nasharlap jatqan elder qatarynda Mianma, Ortalyq Afrika Respýblikasy, Kongo Demokratiialyq Respýblikasy, Somali jáne basqalar.
Sonymen qatar, Gaiti, Shyǵys Afrika, Madagaskar, Mozambik, Aýǵanstannyń batys aýdandarynyń turǵyndaryna klimattyń ózgerýine bailanysty azyq-túlik jetpei jatyr.
Pandemiia men onyń ekonomikalyq zardaby jaǵdaidy qiyndatýda: 2020 jyldyń mamyrynan bastap azyq-túlik baǵasy qymbattap jatyr, ásirese Taiaý Shyǵys, Soltústik Afrika, Ortalyq jáne Shyǵys Aziiada qatty sezilýde.
Baiandama avtorlarynyń málimetinshe, Aýǵanstanda tamaqty toiyp ishpeitinder sany rekordtyq kórsetkishke jetip, 22,8 mln adamdy quraǵan. Sarapshylar shara qoldanbasa osy el turǵyndary asharshylyqtan qyrylýy múmkin dep boljap otyr.
