Muhtar Áýezov atyndaǵy Qazaq memlekettik akademiialyq drama teatrynyń direktory mindetin Jandarbek Sadyrbaev atqaratyn boldy. Bul týraly "Ult aqparat" Tengrinews.kz málimetine súienip habarlaidy.
"Qazaqstan Respýblikasy Mádeniet jáne sport ministrliginiń "Muhtar Áýezov atyndaǵy Qazaq memlekettik akademiialyq drama teatry" Respýblikalyq memlekettik qazynalyq kásipornynyń direktory Bilálov Erlan Ábdildauly 2018 jyldyń 4 qańtarynda istiń mán-jaiy anyqtalǵansha qyzmetinen shettetildi. Shettetilgen ýaqytta mindetti direktordyń shyǵarmashylyq is boiynsha orynbasary Jandarbek Alaidaruly atqarady", - delingen ministrlik habarlamasynda.
Osyǵan deiin Qazaqstan teatrlar assotsiatsiiasynyń prezidenti, Qazaqstan eńbek eri, QR jáne KSRO halyq ártisi Asanáli Áshimov oqiǵa jaily óz pikirin bildirgen edi.
"Búgin óner salasyndaǵy ziialylar, jazýshylar, dramatýrgtar, rejisserlar men teatr qyzmetkerleri jinaldy. Bizdiń teatrymyzda bolǵan oqiǵa - súrensiz jaǵdai, bul barlyǵymyzdy alańdatady, sebebi munda istegen jas direktor, eki jarym jyl osy qyzmette boldy jáne osy ýaqyt ishinde bizdiń damýymyz, gastroldik saparlarǵa shyǵýymyz - ol barlyǵyn da óziniń taza eńbegimen tapty.
Mundai jaǵdai oryn alǵanyna jabyrqaýlymyz. Meniń aitpaǵym, bul iste ony ǵana emes osyny uiymdastyrǵandardy jazalaý kerek. Onyń osynsha qarajatty alǵany - durys emes, ol jazasyn alady. Biz qazir onyń kim ekenin, qandai adam ekenin aitqymyz keledi, biz aitpasaq kim aitady? Kez kelgen adammen osyndai jaǵdai bolýy múmkin, menińshe, bul kezdeisoqtyq. Osylai boldy, adamnyń da súrinetin kezi bolady. Bir rettik jaǵdai - onyń búkil ǵumyryna sabaq bolady. Keleside ol obrazdardy shyǵarý kezinde oǵan osy kómektesedi", - degen edi ol.
Eske sala keteiik, QR eńbek sińirgen qairatkeri, akter, M. Áýezov atyndaǵy Qazaq memlekettik akademiialyq drama teatry basshysy Erlan Bilál 1,5 million teńge paramen ustalǵan edi. QR Memlekettik qyzmet isteri jáne sybailas jemqorlyqqa qarsy is-qimyl agenttiginiń resmi ókili Nurlan Jahinniń málimetinshe, kinásin tolyq moiyndaýyna bailanysty Erlan Bilál qamaýǵa alynǵan joq.
