Qazaqstanda áýejailar, vokzaldar men porttardaǵy namazhanalarǵa salynǵan tyiym qaitadan alynýy múmkin. Bul jaiynda búgin QR Din isteri jáne azamattyq qoǵam ministrliginiń jumys nátijesine arnalǵan qoǵamdyq keńes otyrysynda ministr Nurlan Ermekbaev málim etti, dep habarlaidy QazAqparat.
«Bizdiń jumysymyzdaǵy mańyzdy element bul dini birlestiktermen yntymaqtastyqtyń keń formaty jáne ashyq suhbattastyq. Ministrlik janynda Din máseleleri jónindegi sarapshylar keńesi men Dini basshylar, kóshbasshylary jinalysy jumys isteidi. Jyl saiyn dintanýshylardyń forýmy ótip turady. 12 konfessiianyń ókilderi, quqyq qorǵaýshylar men sarapshylar atalǵan suhbat alańynyń turaqty qatysýshysy bolyp otyr. Biz dini saiasat ádisterin birlesip daiyndap, ózekti máselelerdi talqylaimyz», - dedi ol.
Onyń aitýynsha, atalǵan alańda ministrlik ázirlep jatqan din salasyndaǵy jańa zań jobasynyń tujyrymdamasy jan-jaqty talqyǵa túsken.
«Sarapshylar qoǵamdastyǵymen yntymaqtastyq barysynda memlekettik uiymdarǵa taqaý namaz oqý bólmeleriniń ornalasýyna shekteý qoiýdy joiý boiynsha nusqaýlyq engizildi. Buǵan deiin mundai bólmelerdi 300 metrden jaqyn ornalastyrýǵa bolmaityn edi. Qazirgi sáikesinshe buiryq daiyn bolyp qaldy. Taiaý ýaqytta ol shyǵady dep kútip otyrmyz jáne mundai shekteýler ázirshe dini oqý ornynan bólek bilim ordalary úshin ǵana qalady. Sonymen qatar jańa nusqaýlyq temir jol vokzaldarynda, avtovokzaldarda, áýejailar men teńiz prottarynda namaz bólmelerin ashýǵa tyiymdy alyp tastaidy. Dini ádebietterdi satýǵa arnalǵan arnaiy oryndar oqý mekemesi tóńireginen 300 metrden alys kez kelgen jerde ornalasa alady», - dedi Nurlan Ermekbaev.
Barlyq quqyqtar qorǵalǵan. inform.kz belsendi siltemeni paidalanyńyz http://www.inform.kz/kz/auezhaylar-men-vokzaldardagy-namazhanalar-kayta-ashyluy-mumkin_a3015096
