Memlekettiń zaiyrly qaǵidattarynyń saqtalýyn qamtamasyz etý jáne din jolyndaǵy azamattardyń suranysyna sáikes, Din isteri jáne azamattyq qoǵam ministriligi qulshylyq bólmelerin (namazhana) ashýǵa jáne dini ádebietti satatyn kitap dúkenderine arnalǵan talaptardy qaita qarady. Bul týraly ministrliktiń baspasóz qyzmeti habarlady.
Din isteri jáne azamattyq qoǵam ministri N.Ermekbaevtyń buiryǵymen dini ádebietti jáne dini mazmundaǵy ózge de aqparattyq materialdardy, dini maqsattaǵy zattardy taratý úshin arnaiy statsionarlyq úi-jailardyń, sondai-aq ǵibadat úilerinen (ǵimarattarynan) tys jerlerde dini is-sharalardy ótkizýge arnalǵan úi-jailardyń ornalastyrylýyn aiqyndaý jónindegi Jańa nusqaýlyq qabyldandy.
Jańa nusqaýlyqqa engizilgen jańashyldyqtardyń negizgisi - temirjol jáne avtovokzaldar, áýejailar men porttarda dini is-sharalardy ótkizýge arnalǵan qulshylyq bólmelerin ashýǵa qatysty shekteýdiń alynyp tastalýy. Atalǵan ózgeris - alys jolǵa shyǵyp, saiahattaityn dindarlardyń dini qajettilikterin qanaǵattandyrý men olarǵa barynsha jaǵdai jasaý maqsatynda engizilip otyr. Elimizge qonaq retinde keletin nemese el aýmaǵynda saiahattap júretin dindarlar ushaqtaryn nemese qatynaityn kólik túrlerin kútip, áýejailar men avto jáne temirjol vokzaldarynyń kútý bólmelerinde uzaq ýaqyt boiy otyrýǵa májbúr bolyp jatady. Sondyqtan olardyń qulshylyq jasaýyna atalǵan ǵimarattarda arnaiy oryndar bolýy qajet.
Buryndary memlekettik organdardan 300 metr qashyqtyqta ornalaspasa úi-jailarda qulyshylyq bólmelerin (namazhana) ashýǵa shekteý qoiylatyn, endi, 300 metrge deiingi shekteý dini bilim uiymdaryn qospaǵanda, tek barlyq bilim mekemeleriniń aýmaǵyna qatysty qoldanylatyn bolady.
«Sonymen birge, qulshylyq etý bólmelerin ashqan ýaqytta qulshylyq jasaý úshin qajetti jaǵdailardyń qamtamasyz etilýi úshin tiisti talaptar saqtalýy kerek. Dini is-sharalardy ótkizýge arnalǵan úi-jailardyń jalpy aýdany 20 sharshy metrden bastap 100 sharshy metrge deiin bolýy qajet, sondai-aq, úi-jailar kúzetti basqarý pýltine tikelei shyǵatyn beinekameralarmen jabdyqtalýy tiis.
Budan bólek, atalǵan úi-jailar dáret alý úshin qajetti sanitarlyq torappen qamtamasyz etilip, jáne zańnamaǵa sáikes sanitarlyq-epidemiologiialyq talaptarǵa sai bolýy kerek», - delingen habarlamada.
Al, qoǵamdyq oryndarda qulshylyq bólmelerin ashý nemese ashpaý sheshimin ǵimarat ieleriniń ózderi qabyldaidy, sondai-aq ashýǵa qajetti shyǵyndardy da óz qaltalarynan óteidi.
