Kólik politseileri elorda áýejaiynda Almaty qalasynyń eki turǵynyn ákimshilik quqyq buzýshylyq úshin jaýapkershilikke tartty, dep habarlaidy "Ult aqparat".
25 qazanda Nur-Sultan qalasynyń áýejaiyndaǵy jelilik politsiia bólimine Nursultan Nazarbaev halyqaralyq áýejaiy tekserý qyzmetiniń inspektory eki jolaýshyǵa qatysty shara qabyldaý týraly ótinishpen keldi.
Onyń aitýynsha, olar balaǵat sózder aityp, ózderin dóreki ustaǵan, sóitip «FlyArystan» áýekompaniiasynyń «Nur-Sultan – Almaty» baǵytyndaǵy reisine otyrǵyzý talonynsyz ótýge tyrysqan.
Oqiǵa ornynda áýejaidaǵy politsiia qyzmetkerleri olardy tynyshtandyrýǵa tyrysqanymen, olar tártip saqshylarynyń eskertýine qulaq aspai, baǵynbaǵan.
Tekserý barysynda kólik politseileri olardyń 1985 jáne 1986 jyly týǵan Almaty qalasynyń turǵyndary ekenin anyqtady.
Meditsinalyq kýálandyrý qorytyndysyna sáikes atalǵan azamattar jeńil dárejedegi alkogoldi mas bolǵan.
Osy fakti boiynsha politseiler QR ÁQBtK 440-babynyń 1-bóligi, QR ÁQBtK 667-babynyń 1-bóligi jáne QR ÁQBtK 434-babynyń 1-bóligi boiynsha birden úsh ákimshilik hattama toltyrdy.
Qoǵamdyq orynǵa mas kúide kelý faktisi boiynsha olarǵa 5 AEK mólsherinde aiyppul salyndy, sondai-aq ákimshilik materialdar protsessýaldyq sheshim qabyldaý úshin Almaty qalasynyń mamandandyrylǵan aýdanaralyq ákimshilik sotyna joldandy.
