Dárigerlerdi júrek-qan tamyrlary aýrýlary men insýltten zardap shegetinderdiń qatary jyldan-jylǵa ósip jatqany alańdatýda. Derekke júginsek, aýrýdyń osy túrine shaldyqqandar boiynsha Qazaqstan TMD elderi arasynda Resei men Ýkrainadan keiingi úshinshi oryndy ielenedi eken. Atalǵan aýrýlardyń saldarynan eńbek qabiletin joǵaltýshylar sany kúrt ósken. Soǵan orai, sońǵy jyldary máseleni sheshýdiń joldaryn qarastyrǵan Úkimet «Salamatty Qazaqstan» memlekettik baǵdarlamasynyń basty tarmaǵyn qan ainalymynyń buzylýynan bolatyn aýrýlardyń aldyn alýǵa arnady. Osy baǵytta ótken jyly respýblikada 16 insýlt ortalyǵy ashylǵan.
Sońǵy jyldary Qyzylorda oblysynda da qan qysymynyń joǵarylyǵy, júrek-qan tamyry aýrýlary turǵyndar arasynda jii kezdesetini baiqalady. Oblystyq sala basshylary osy jaǵdaidy eskere kele, biylǵy jyly Qazaly aýdandyq temirjol aýrýhanasynyń janynan neiroinsýlt bólimshesin ashýdy uiǵarǵan bolatyn. Osynaý jaǵymdy jańalyq barshany eleń etkizdi. Buryn osy dertpen syrqattanǵandardy shalǵaidan oblys ortalyǵyna aparatyn bolsaq, endi aýdannyń dárigerleriniń kómegine júgine alatyndyǵymyz qýanyshty jait edi. Osy turǵyda atqarylǵan sharýa, aýdan kóleminde qan qysymy joǵary naýqastardy emdeý barysy týraly neiroinsýlt bóliminiń meńgerýshisi Dastan Amanbaimen sóilesýdi jón sanaǵan edik.
«Bólimsheniń ashylǵanyna kóp ýaqyt ótpegenimen jumys júieli de sapaly júrip jatyr dep tolyq aitýǵa bolady. Oǵan qosa oblys aýdandarynyń ishindegi jalǵyz neiroinsýlt ortalyǵy ázirge tek Qazalyda ǵana ornalasqan. Naqty kezeńde aýdan turǵyndarynan bólek, Aral, Qarmaqshydan da kóptegen naýqas kelip em alýda. Jyl basynan beri 9 aidyń ishinde 220 naýqas túsip, ońalyp shyqty. Aldymen aýrýhanaǵa kelgen naýqasqa kompiýterlik tomografiia jasalyp, naqty diagnoz qoiylǵannan keiin jan saqtaý bólimine jiberiledi. Jaǵdaiy jaqsarǵan soń jalpy bólimge shyǵarylyp, emin alady. Meditsinalyq kómektiń barlyǵy tegin júrgiziledi. Eskeretin jai, tromblizis ádisi boiynsha naýqasty tolyq aiyqtyryp jiberýge múmkindik bar. Ol úshin azamat aýyrǵannan bastap úsh saǵattyń ishinde ortalyqqa kelýi tiis. Tili kúrmelip, qan qysymy kóterile bastaǵanyn sezse, dereý jedel járdem kóligin shaqyrtyp, ortalyqqa kelýi kerek. Olai deitinim, alǵashqy úsh saǵatta tromblisiz ádisi arqyly, iaǵni arnaiy dári jiberip, mi qan tamyryndaǵy trombty eritip jiberýge bolady. Bul degenimiz qan tamyrlarynda uiyp, túiirshiktelgen qandy eritip, naýqastyń jaǵdaiyn burynǵy qalpyna keltirý degendi bildiredi. Osy ýaqytta júrgizilgen emdeý ádisi ǵana óz nátijesin beredi. Aýrýdyń alǵashqy belgisi bilingen sátten der kezinde bizge kelip kóringen bes naýqasqa joǵaryda aitylǵan tromblizis jasaldy. Sonyń nátijesinde bes naýqastyń barshasy saýyǵyp shyǵyp, otbasyna qaýyshty», – deidi dáriger Dastan Amanbai.
Taǵy bilgenimiz, osy bólimshede 6 naýqastyń basyna sátti operatsiia jasalypty. Osylaisha olardyń miynda uiyp qalǵan qan alynyp, aman qalypty. Óte qýantarlyq jaǵdai. Sonymen qatar, bólimshege qarasty naýqasty qalpyna keltirý kabinetinde 75 adam em alǵan. Súisinerligi, mundaǵy dene shynyqtyrý bólmesi sońǵy úlgidegi sport qurylǵylarymen jasaqtalynǵan eken.
Aýrýhananyń neiroinsýlt bólimshesinde emdelýshi Aisulý Sydyq esimdi ájemen tildeskenimizde: «Meniń basyma qan qysymymnyń kóterilýine bailanysty osy jerde ota jasaldy. Shúkir, qazir saýyǵyp kelemin. Jaǵdaiym da birshama jaqsaryp qaldy. Emdeýshi dárirgerler meniń jai-kúiimdi kelip qadaǵalap turady. Dári-dármekterdi ýaqytyly alamyn. Dárigerler men meiirbikelerge analyq alǵysym sheksiz», – degen lebizin jetkizdi.
Aita keteiik, búgingi áńgimemizge arqaý bolǵan Qazaly temirjol aýrýhanasynyń ujymynda kásibi saýattylyǵy, bilik-parasatymen jurshylyqtyń yqylasyna bólenip júrgen meditsina salasynyń maitalmandary eńbek etedi. Aýrýhana 1904 jyly shaǵyn ambýlatoriia esebinde ashylǵan. Al bir jyldan keiin Orynbor temirjol bóliminiń qurylýyna bailanysty temirjol aýrýhanasy bolyp ózgertildi. Mine, ǵasyrdan astam ýaqyttan beri halyqqa turaqty qyzmet jasaýda. Elimiz táýelsizdik alǵannan soń aýrýhana zamana talabyna sai ǵimaratqa kóshirilip, jańa úlgidegi qondyrǵylarmen jabdyqtaldy. Talai jannyń alǵysyn arqalaǵan ujymdy QR Densaýlyq saqtaý isiniń úzdigi Qubyl Rshymbetov basqaryp keledi.
Eset TABYNBAEV
Qyzylorda oblysy
.jpeg)