Atyraýda 6 qazannan beri Reseidiń Astrahan oblysynan kelgen 7 adamnan koronavirýs anyqtaldy, dep habarlaidy "Ult aqparat".
Atyraý oblysynyń bas memlekettik sanitar dárigeri Amantai Jumaǵalievtyń aitýynsha, Qazaqstan aýmaǵyna Resei Federatsiiasynyń Astrahan oblysynan 6 qazannan beri shekaradaǵy ótkizý pýnkti arqyly 13 myńnan astam adam kelgen.
«Onyń ishinde 1 656 adamda – 210 jolaýshy men 1446 júrgizýshide PTR-testten ótkeni týraly anyqtama bolǵan joq. Olardyń bári karantindik statsionarǵa jatqyzyldy. Al, 6 júrgizýshi men bir jolaýshynyń PTR-test qorytyndysy koronavirýsqa oń nátije kórsetti. Naýqastyń bári emdelýge jiberildi», - deidi Amantai Jumaǵaliev.
Atyraýdaǵy H.Dospanova halyqaralyq áýejaiyna kelgen jolaýshylardan koronavirýs infektsiiasy tirkelmegen.
