Sultan Sársemálievtiń sotynda sýdia bolyp júrgen Zarema Hamidýllina kólemdi suhbat berdi, dep habarlaidy ult.kz.
Ol “Atyraý” gazetine bergen suhbatynda Jangeldindegi qylmys týraly suraqtarǵa jaýap berdi.
– Ózińiz bilesiz, qazir Jangeldin aýylynda bir otbasyn qatygezdikpen óltirý boiynsha qylmystyq is – qoǵamnyń basty nazarynda. Sot otyrystarynda kórsetiletin keibir beinematerialdardy qarapaiym adamnyń sońyna deiin qaraýǵa dáti jetpeidi. Al sýdia sol dálelderdiń bárin muqiiat zertteýge mindetti. Mundai psihologiialyq júktemeni qalai eńseresiz?
– Sýdia qaralyp jatqan is boiynsha túpkilikti sheshim qabyldanǵanǵa deiin onyń mán-jaiyna qatysty pikir bildire almaidy. Sondyqtan naqty atalǵan is boiynsha qandai da bir baǵa berý nemese aqparat aitý zań talaptary men sýdia ádebine qaishy keledi.
Jalpy aýyr qylmystyq isterdi qaraý sýdiadan joǵary psihologiialyq tózimdilik pen kásibi beriktikti talap etedi. Keibir isterdegi beinejazbalar, saraptama qorytyndylary nemese ózge de dáleldemeler kez-kelgen adam úshin aýyr qabyldanýy múmkin. Mundai materialdardyń artynda qaiǵy, adam taǵdyry, orny tolmas ókinish jatady.
Soǵan qaramastan sýdianyń basty mindeti – emotsiiaǵa emes, zańǵa súiene otyryp, árbir dáleldemeni tolyq, jan-jaqty jáne obektivti zertteý. Sot tóreligin júzege asyrý barysynda quqyqtyq ólshem birinshi orynda turýy tiis.
Mundai jaǵdaida sýdia kásibi bilimine, tájiribesine jáne ishki jaýapkershilik sezimine arqa súieidi. Ár istiń artynda adam taǵdyry turǵanyn túsiný jaýapkershilik júgin kúsheitkenimen, sonymen birge ádil sheshim qabyldaýǵa degen mindetti de aiqyndaidy. Sondyqtan qandai kúrdeli is bolsa da, zańdylyq pen ádildik qaǵidattarynan aýytqymaý – sýdianyń basty ustanymy ári qoǵam aldyndaǵy missiiasy.
Sonymen qatar psihologiialyq tepe-teńdikti saqtaý da mańyzdy. Bul rette otbasynyń qoldaýy erekshe rol atqarady. Kitap oqý, tabiǵat aiasynda serýendeý, rýhani jáne mádeni demalysqa ýaqyt bólý siiaqty qarapaiym nárseler de oidy sergitip, ishki turaqtylyqty saqtaýǵa yqpal etedi. Keide dál osyndai qarapaiym dúnieler adamnyń kúsh-qýatyn qalpyna keltiredi.
