Atyraýdaǵy atystan jaraqat alyp, aýrýhanaǵa túsken jigitke operatsiia jasaldy. Biraq, naýqas áli esin jiǵan joq, komada jatyr, dep habarlaidy QazAqparat.
Buǵan deiin Atyraýda atystan úsh adam mert bolyp, bireýi aýrýhanaǵa túskenin, kúdiktiniń qamaýǵa alynǵanyn jazǵan bolatynbyz.
Oblystyq politsiia departamenti baspasóz qyzmetiniń aqparatyna súiensek, atys keshe, 15 naýryzda saǵat 22:10 shamasynda bolǵan. Atyraý qalasynyń «Avangard-3» shaǵynaýdanyndaǵy aialdamada tapanshadan atylǵan oqtan 27 jáne 23 jastaǵy eki jigit qaza tapqan. Keiinnen 27 jastaǵy taǵy bir jigittiń mert bolǵany anyqtaldy.
Al, saǵat 22:50-de oblystyq aýrýhanaǵa 1995 jylǵy azamat aýyr jaǵdaida túsken.
«Ol – Atyraý qalasynyń mańyndaǵy Erkinqala eldi mekeniniń turǵyny. Oqtan naýqastyń bas súieginiń sol jaq bóligi, miy jaraqattanǵan. Bet súiegi jyrylǵan. Dárigerler naýqastyń basyna ota jasady. Naýqastyń otadan keiingi jaǵdaiy áli aýyr. Áli komada jatyr. Qazir oblystyq aýrýhananyń jansaqtaý bólimshesinde dárigerlerdiń jiti qadaǵalaýyna alyndy», - dep habarlady oblystyq densaýlyq saqtaý basqarmasynyń baspasóz qyzmeti.
