Atyraý oblysyna qarasty Qarabatan stansasyndaǵy órt kezinde zardap shekkender qalai aman qalǵanyn aityp berdi, dep jazady sputniknews.kz.
Kompaniiada bir jylǵa jýyq jumys istegen 36 jastaǵy dánekerleýshi Qanat Jarqynbekov túngi aýysymnan keiin tańǵy as iship otyrǵanda kenetten ǵimarat órtene bastaǵan.
"Jalyn esik jaqtan sharpydy, sondyqtan esikten shyǵa almai, terezden sekirdim. Órt neden shyqqanyn túsinbei de qaldyq, sekirip jáne shyǵyp úlgergenderimiz órt sóndirýshiler men "jedel járdemdi" syrtta kúttik", — dedi ol "Moi gorod" saityna.
Jarqynbekov Qyzylordada áieli men tórt balasy kútip otyrǵanyn aita ketti.
27 jastaǵy Shymkent turǵyny jataqhanadan der kezinde shyǵyp ketpegende órtten qaza tabýy múmkin edi.
"Túngi aýysymnan keiin tańerteń dýshqa túsip jatqan edim. Esik syrtyndaǵy aiqaidy estip, bólmege júgirdim. Qolyma ilingen zattarymdy alyp, artqy esikten shyǵyp úlgerdim, óitkeni aldyńǵy esik jaq órtenip jatyr edi. Jataqhanadan kim qalai shyqqanyn kórgen joqpyn, ainala qyzyl jalynǵa oranyp, tútin basyp qaldy, órt sóndirýshiler bári bitkennen keiin keldi. Aman qalǵanym úshin Jaratqanǵa alǵys aitamyn, úide áielim men úsh balam kútip otyr. Dosym aýrýhanada qaza boldy", — deidi dánekerleýshi Ulan Baishaǵarov.
2 naýryz kúni tańerteń saǵat toǵyzda Atyraýdan 40 kilometr jerde jataqhana órtendi. Baspana retinde paidalanylǵan konteinerlerde túngi aýysymdaǵy jiyrma adam bolǵan. Oqiǵa ornynan alty adamnyń máiiti tabyldy. Taǵy bir adam aýrýhanada kóz jumdy.
