Atyraýda túrmege telefon laqtyrǵandar qamaýǵa alyndy, dep habarlaidy "Ult aqparat".
Atyraý oblysy boiynsha Qylmystyq-atqarý júiesi departamenti baspasóz qyzmetiniń málimetinshe, ÝG-157/9 (erler túzeý koloniiasy) mekemesiniń qorshaýynan tyiym salynǵan zattardy laqtyrmaq bolǵan eki er adam ustalǵan.
«Olar Atyraýǵa Mańǵystaý oblysynan arnaiy kelgen. Tekserý kezinde olardan uialy telefondar, internet modem, qulaqqaptar men qýattandyrǵysh tabyldy. 25 jastaǵy eki azamattyń buryn sottalǵany belgili boldy» dep habarlady departamenttiń baspasóz qyzmetinen.
Ustalǵan azamattar buǵan deiin de osyndai quqyq buzýshylyq jasaǵan. Sol kezde sot olarǵa eskertý bergen. Al, bul joly sot sheshimimen ekeýi de 20 táýlikke ákimshilik qamaýǵa alyndy.
«ÝG-157/9 mekemesiniń aýmaǵynda «Sergek» beinebaqylaý júiesi ornatyldy. Túrmeniń mańyna politsiia qyzmetkerleri únemi baqylaý júrgizedi. Al, tyiym salynǵan zattardy ótkizýge umtylý sekildi quqyq buzýshylar qatań jazalanatyn bolady», - deidi departament bastyǵy Manarbek Ǵabdýllin.
