Atyraý oblysyndaǵy jataqhanada janyp ketken jumysshylardyń múrdeleri úilerine jetkizildi. Qarabatandaǵy gaztýrbinaly elektr stansasynyń qurylysynda órtenip ketken 7 jumysshynyń barlyǵy Ońtústik Qazaqstannan ekeni aitylǵan edi, dep habarlady KTK.
Jumys isteýge ketip, tabytpen oralǵandardyń týystary qaiǵydan qan jutyp otyr. Qaza tapqan jumysshylardyń eń úlkeni 39-da, eń jasy 27-de ekeni belgili. Keshe sol 27 jastaǵy Maqsat Shyńǵysbaevtyń múrdesi úiine jetkizildi. Órtenip ketken jumysshynyń denesin áýejaidan ákelgen boida janaza bastalyp ketti. Týystarynyń marqumdy sońǵy saparǵa shyǵaryp salýǵa da kóp ýaqyty bolmady. Tabytty ashpaǵan kúii jerleýge áketti. Aýyr qaiǵydan qabyrǵasy qaiysqan týystary jaqyndarynyń ólimine ol jumys istegen mekemeniń salǵyrttyǵy sebep boldy deidi.
"Jańaǵy kazarmadan 380 volt jeli ótedi eken. Sol jeli tuiyqtalyp úzilip, jerge túsken, jan-jaqtyń bári temir qorshaý. Kazarmada nege signalizatsiia joq? Nege órt sóndirý quraly joq? Nege qutqarý aparattary joq?", — deidi marqumnyń týysy Táttigúl Súleeva.
Úiindegi uldyń úlkeni Maqsat 2 jyldai Atyraý oblysynda ákesimen birge vahtalyq ádispen dánekerleýshi bolyp jumys istep júrgen. Naýryzdyń 10-na ózi kelip, ákesi ketýi kerek bolǵan eken. Sońǵy ret órtenerden 15 minýt buryn ǵana jaqyndarymen sóilesken ol túngi aýysymnan shyqqanyn aitypty. Onyń artynda 2 qyzy men uly qaldy. Jetim atanǵan balalarynyń eń úlkeni bar-joǵy 4 jasta.
"Esik-tereze isteý kerek. 12 metrlik uzyn vagonnyń ishine jaiǵastyrǵan, túrmege qamaǵanmen birdei ǵoi. Kontslagerdegi qul ǵoi. Durys pa? Bul múmkin emes", — deidi marqumnyń týysy Serik Omarov.
Marqumdardyń týystary 7 adam tiridei janyp ketken dókei kompaniiada qatań jáne tolyq tekseris bolýyn talap etýde. Áitpese qazaqtardyń qoisha qyrylýy toqtamaidy dep esepteidi.
Eske salsaq, 2 naýryz kúni Qarabatan stansasyndaǵy "Gaztýrbinaly elektr stantsiiasynyń" qurylysy júrip jatqan aimaqtaǵy jataqhana órtenip, 6 adam tiridei janyp ketken edi. Al, tórteýi aýrýhanaǵa túsken bolatyn. Keiin denesiniń 75 paiyzy kúiip qalǵan taǵy bir jumysshy aýrýhanada qaitys boldy.
