Atyraýda 16 jastaǵy oqýshy qyz josparly operatsiiadan keiin qaitys boldy. Naýqas jansaqtaý bóliminde 18 kún jatqan. Ata-anasy qyzynyń ólimine ne sebep bolǵanyn anyqtaýdy talap etip otyr, dep habarlaidy ult.kz.
«Aq Jaiyq» basylymynyń málimetinshe, reanimatolog dárigerdiń aitýynsha, qyz jansaqtaý bóliminde meditsinalyq hattamaǵa sáikes em qabyldaǵan. Alaida onyń jaǵdaiy birtindep nasharlai bergen. Dáriger qarqyndy em júrgizilgenin jáne murnyndaǵy tamponnyń ýaqytynda alynǵanyn málimdedi.
Al marqumnyń ata-anasy otadan keiingi alǵashqy saǵattarda qyzyna qandai meditsinalyq kómek kórsetilgenin, onyń qanshalyqty ýaqytyly bolǵanyn jáne asqynýdyń aldyn alýǵa múmkindik bar-joǵyn anyqtaýdy surap otyr.
Atyraý oblysynyń densaýlyq saqtaý basqarmasy jaǵdaidy baqylaýǵa alǵan. Vedomstvo arnaiy komissiia qurylyp jatqanyn habarlady.
Basqarma málimetinshe, jasalǵan operatsiia tehnikalyq turǵydan kúrdeli ári joǵary dáldikti talap etedi. Mundai hirýrgiialyq aralasýdan keiin belgili bir qaýipter men asqynýlardyń týyndaý yqtimaldyǵy joqqa shyǵarylmaidy.
«Operatsiiadan keiin patsienttiń jaǵdaiy kúrt nasharlaýyna bailanysty meditsinalyq uiym tarapynan shuǵyl jáne qarqyndy emdeý sharalary tolyq kólemde júrgizildi. Sonymen qatar tiisti beiindi mamandar men respýblikalyq deńgeidegi sarapshylardyń konsýltatsiialary uiymdastyryldy», – dedi vedomstvo ókili.
Qazir oqiǵanyń barlyq mán-jaiy, kórsetilgen meditsinalyq kómektiń ýaqtylyǵy men sapasy, sondai-aq asqynýdyń sebepteri anyqtalyp jatyr. Meditsinalyq qujattar táýelsiz beiindi mamandardyń qatysýymen qaralady.
Densaýlyq saqtaý basqarmasy tekserý men saraptama tolyq aiaqtalǵansha aldyn ala qorytyndy jasaýǵa bolmaitynyn atap ótti. Naýqasqa qatysty meditsinalyq aqparat dárigerlik qupiia men derbes derekterdi qorǵaý talaptaryna bailanysty jariialanbaidy.
Marqum biyl 11-synypqa barýy kerek bolǵan. Ol otbasyndaǵy tuńǵysh perzent edi.
