Atyraýda oblys ákiminiń birinshi orynbasary ustaldy, dep habarlaidy "Ult aqparat".
Atyraý oblysynyń Sybailas jemqorlyqqa qarsy is-qimyl departamentiniń baspasóz qyzmetiniń habarlaýynsha, búgin Atyraýda oblys ákiminiń birinshi orynbasary Nurlan Taýbaev pen oblystyq qurylys basqarmasynyń basshysy Timýr Basarov ustaldy.
Olar aimaqtyń infraqurylymdyq damýy men jol qurylysymen ainalysatyn kompaniialardyń birinen 182 million teńge kóleminde para aldy degen kúdikke ilindi. Tergeý múddesi úshin istiń mán-jaiy áli ashylǵan joq.
Eske sala keteiik, sybailas jemqorlyqqa qarsy qyzmet Nurlan Taýbaev qatysqan Atyraý oblysy ákimdiginiń ókpeni jasandy jeldetý (ÓJJ) apparattaryn satyp alýy týraly isti tergep jatyr.
«Biz qujattardy Atyraý oblysy boiynsha ishki memlekettik aýdit departamentine jiberdik. Olar bizge qorytyndy berýi kerek, sodan keiin biz qylmystyq is qozǵala ma, joq pa, sony sheshemiz. Meniń bilýimshe, aýditorlardyń jumysy óte kóp, sol sebepti olar úlgermei jatady. Biz de kútýdemiz», – dep ÓJJ boiynsha isti tergeý barysyna qatysty túsinik berdi Atyraý oblysy boiynsha sybailas jemqorlyqqa qarsy is-qimyl departamenti basshysynyń birinshi orynbasary Aidos Mamyt.
Eske sala keteiik, Nurlan Taýbaev oblys ákiminiń birinshi orynbasary laýazymyna mamyr aiynda, al Timýr Basarov Atyraý oblysynyń qurylys basqarmasynyń basshysy qyzmetine maýsym aiynyń sońynda taǵaiyndalǵan bolatyn.
