Atyraýda kópirden sekirgen júkti áieldiń 4 qabyrǵasy synǵan. Aýrýhanaǵa túsken naýqasqa dárigerler men psiholog kómek kórsetip jatyr, dep habarlaidy QazAqparat.
Oblystyq politsiia departamenti baspasóz qyzmetiniń málimetinshe, búgin, 7 jeltoqsan saǵat 9:20 shamasynda jedel basqarý ortalyǵynyń inspektory beinebaqylaý kameralary arqyly Atyraý qalasyndaǵy «Turǵyn úi qalashyǵy – Avangard» shaǵynaýdandaryn jalǵaityn jaiaý júrginshiler kópirinde kúdik týdyrǵan áieldi kórgen.
«Inspektorlar bul týraly jaqyn mańdaǵy patrýl politsiia qyzmetkerlerine habar bergen. Patrýldik politsiia batalonynyń rota komandiri, politsiia kapitany Almas Zakariev jaiaý júrginshiler kópirine baryp, sekirmek bolǵan azamatshany raiynan qaitarǵysy kelgen. Biraq, júkti áiel politsiia qyzmetkerimen áńgimelespei, sekirip ketken. Alaida, oqiǵa ornyna der kezinde qaiyqpen jetken politsiia departamentiniń qyzmetkerleri, politsiia leitenanty Jandarbek Jańbyrbaev pen politsiia serjanty Aibat Jaýbaev kópirden sekirgen áieldi qutqaryp qaldy», -dep málim etti departamenttiń baspasóz qyzmeti.
Oblystyq densaýlyq saqtaý basqarmasynyń baspasóz qyzmetinen málim etkendei, kópirden sekirgen áieldiń jasy – 29-da.
«Jedel járdem brigadasynyń kóligimen oblystyq aýrýhanaǵa jetkizilgen áieldiń júktiligi anyqtaldy. Júktilik merzimi – 4 apta. Onyń Oral qalasynda turatyny belgili boldy. Qazir dárigerler neirohirýrgiia bólimine túsken júkti áieldiń jaǵdaiyn «ortasha» dep baǵalap otyr. Naýqastyń 4 qabyrǵasy synǵan. Oǵan meditsinalyq kómektiń barlyq túri kórsetilip, emdeý sharalary jasalyp jatyr. Densaýlyǵy qalpyna kelip, saýyǵyp shyqqanǵa deiin dárigerler men psihologtyń baqylaýynda bolady», -dep habarlady basqarmanyń baspasóz qyzmeti.
