Foto: Atyraý oblystyq politsiia departamenti
Atyraý oblysynda jyl basynan beri kiikti zańsyz aýlaǵandardan 335 múiiz, tegis uńǵyly 7 qarý tárkilendi. Quqyq buzýshylardan 283 mln teńge aiyppul óndirilgen, dep habarlaidy Ult.kz Kazinform-ǵa silteme jasap.
Atyraý oblystyq politsiia departamenti tabiǵat qorǵaý politsiia tobynyń aǵa inspektory Nurlybek Qanatovtyń málimetinshe, kesheden beri «Kiik-2024» tabiǵatty qorǵaý aktsiiasy ótip jatyr.
«Bul aktsiiany ótkizýdiń birneshe maqsaty bar. Birinshiden, kiik popýliatsiiasyn qorǵap, sanyn kóbeitýge yqpal etý. Ekinshiden, brakonerlerge qarsy kúres kúsheitilip, quqyq buzýshylarǵa qatań jaza qoldanylady. Máselen, biyl jyl basynan beri oblysta janýarlar dúniesin qorǵaýǵa qatysty 83 quqyq buzýshylyq anyqtaldy. Quqyq buzýshylardan 335 dana kiik múiizi, 7 tirkelmegen tegis uńǵyly ańshy qarýy tárkilendi», - deidi Nurlybek Qanatov.
Al, oblystyq orman sharýashylyǵy jáne janýarlar dúniesi aýmaqtyq inspektsiiasynyń bas mamany Mereke Shalharovtyń pikirinshe, kiiktiń kóbeiýine keri áser etetin qaýipti sebepter bar.
«Aldymen bul jait brakonerlikke qatysty bolyp otyr. Ekinshiden, tabiǵi sipattaǵy apattardyń yqpaly bar. Úshinshiden, kiik mekendeitin jer azaidy. Byltyr 7 qylmystyq is tirkelip, sotqa joldanǵan edi. Sonyń nátijesinde óndirilgen qarjy 6,5 mlrd teńgeni qurady. Al, biyl tirkelgen qylmystyń 4-eýi sotqa joldandy. Kiikti zańsyz aýlaýshylardan 283 mln teńgege jýyq qarjy memleket paidasyna óndirildi. Ózge qylmystyq ister ekeýi tergelip jatyr», - dep habarlady Mereke Shalharov.
«Ohotzooprom «ÓB» RMQK bas direktordyń orynbasary Baqtiiar Ramazanovtyń aitýyna qaraǵanda, qazir aýa raiynyń salqyndaýyna bailanysty kiiktiń kóshi-qony aýystyrady.
«Qazir kiikter Atyraý oblysyna qarai baǵyt aldy. Sol sebepten, bizdegi arnaiy jasaq toptary kúsheitildi. Kiiktiń qozǵalysyn baqylaýǵa 225 inspektor tartylyp otyr. Olarǵa 150-ge jýyq kólik bólindi», - dep málim etti Baqtiiar Ramazanov.
Eske sala ketelik, buǵan deiin Atyraýda brakonerlerden bir aida 300-den asa keli bekire tárkilengenin jazǵan edik.
