Atyraý qalasynyń sáýleti «Qumarshyq dáni» músindik-sáýlet kompozitsiiasymen tolyqty, dep habarlaidy "Ult aqparat".
Eskertkishtiń ashylý saltanatyna óńirge belgili óner jáne qoǵam qairatkerleri qatysty.
1929-33 jyldary asharshylyqtan kóptegen adam kóz jumǵany belgili. Sol zulmatty Atyraý óńiri de kórdi. Sonaý bir shaqta Atyraý óńiri, Naryn qumyn jaǵalai qonystanǵan halyqty ashtyqtan aman alyp qalǵan azyqtardyń biri qasietti ósimdik Qumarshyq edi. Ol daqyl jóninde aǵa urpaq bolmasa, keiingi urpaq bile bermeidi.
«Qumarshyq dáni» kompozitsiiasy – ult tarihyna qoiylǵan eskertkish. Búgingi jáne jas urpaq tarihyn umytpasyn degen oimen qolǵa alǵan isimizdiń biri. 2016 jyly bul jobany biz oblys ákimine usynyp, eskertkish ornatýǵa yqpal etýin suraǵanymyzda, biraýyzdan usynysymyzdy maquldap, qoldaý kórsetti. Bul eskertkish búgingi urpaqtyń aǵa býyn aldyndaǵy paryzy, jas urpaqqa amanaty. Bul usynysty zerdelep, tarihqa taǵzym dep, halyqty ashtyqtan saqtap qalǵan, dúniege ulttyń tanymal talantty tulǵalaryna ómir syilaǵan ósimdikke eskertkish qoiýdy qoldaǵan jergilikti atqarýshy bilikke alǵysym sheksiz»- dedi joba avtorynyń biri Tursyn Kalimova.
Aita keterligi, músin aqyn Fariza Ońǵarsynqyzynyń eskertkishiniń mańynda tur. Qola men granitten jasalǵan kompozitsiia shartty úsh elementten turady. Ol - relefti qabyrǵa, ortalyq element jáne tuǵyr. Relefti qabyrǵanyń aldy men artqy bóliginde sol qumarshyq týraly jyr joldary men sol kezdegi zulmat bederlengen: kámpeskelengen mal, ashyqqan jurt, talǵajaý bolǵan qumarshyqty jinap, tamaq etken adamdar.
Granitten jasalǵan tuǵyr qumarshyq ósetin Naryn qumdarynyń espe shaǵyldaryn bildiredi. Ortalyq element - relefti jaryp shyqqan qumarshyq jáne qol ustasqan ul men qyz bala. Eskertkishtiń jalpy biiktigi 4,2 metr.
Aita keteiik týyndy avtorlary - Qazaqstan jýrnalister odaǵynyń múshesi, qoǵam belsendisi Tursyn Kalimova, músinshi Rinat Ábenov, qola quiýshy Amanjol Múkenov, Qazaqstan sýretshiler odaǵynyń múshesi, sáýletshi Asylbek Muhamedjanov. Oryndaǵan QR tas qalaýshysy Roman Titýshin.
Eskertkishke oblys ákimi Nurlan Noǵaevtyń atynan gúlshoqtary qoiylyp, qala ákiminiń mindetin atqarýshy Ulyqbek Tnáliev joba avtorlaryna qala ákimdigi atynan alǵys hattar tabystady.
