Atyraýda eki turǵynnyń kóliginen 364 kiik múiizi tárkilendi, dep habarlaidy Oblystyq politsiia departamenti baspasóz qyzmeti.
Kriminaldyq politsiia basqarmasy men balyq qoryna qylmystyq qol suǵýshylyqpen kúres bóliminiń qyzmetkerleri jedel-izdestirý is-sharasyn júrgizgen.
«Is-shara kezinde Atyraý qalasyna taiaý ornalasqan «Geolog» yqshamaýdanyndaǵy kópqabatty úilerdiń biriniń aýlasynda turǵyn eki kóliktiń ishinen 364 dana kiik múiizi tárkilendi. «VAZ-21014» avtokóliktiń birinen 200 dana kiik múiizi men quqyq qorǵaý organynda tirkelmegen qos uńǵyly «TOZ-16» markaly ańshy myltyǵy tabyldy. Al, ekinshi kólikte 164 dana kiik múiizi men ruqsat qujattary joq 4,5 kalibrli «Baikal MR-512» markaly qarý bary anyqtaldy» -dep habarlady departamenttiń baspasóz qyzmetinen.
Qazir kúdiktiler – Isatai aýdany men Atyraý qalasynyń 23 jastaǵy eki turǵynyna qatysty QR Qylmystyq kodekstiń 339-baby, 1-bóligimen sotqa deiingi tergep-tekserý amaldary júrgizilip jatyr.
