Foto: ashyq derekkóz
Atyraý oblysynda qoǵamdy dúr silkindirgen bir otbasynyń ólimine qatysty qylmystyq is sotqa joldandy. Qyzylqoǵa aýdany Jangeldin aýylynda bolǵan oqiǵa boiynsha alǵashqy sot otyrysy 18 mamyr kúni saǵat 11:00-de ótedi. Is ashyq rejimde qaralady, dep habarlaidy Ult.kz.
Bul týraly oblystyq sottyń baspasóz qyzmeti habarlady. Isti Atyraý oblysynyń qylmystyq ister jónindegi mamandandyrylǵan aýdanaralyq sotynyń sýdiasy Zarema Hamidýllina qaraidy.
Tergeý málimetinshe, kúdikti Sultan Sarsemalievke qatysty QR Qylmystyq kodeksiniń 99-baby 2-bóligi (eki nemese odan da kóp adamdy óltirý), sondai-aq mal urlaý jáne bank kartalaryn jymqyrý baptary boiynsha aiyp taǵylǵan.
Sot saraptamasy men tergeý derekterine sáikes, Naýryz Muqanǵaliev 2025 jyldyń mamyr aiynda, al otbasynyń taǵy úsh múshesi qarasha aiynda qaza tapqan. Saraptama kúdiktini psihikalyq turǵyda saý dep tanyǵan.
Qylmys alǵash ret 2025 jyldyń sońynda otbasy músheleri joǵalǵannan keiin belgili boldy. Keiin 6 qańtarda Jangeldin aýylynda Maqsot Qarabalin men Násip Óteshqalievanyń denesi tabylǵan, olardyń denesinde pyshaq izderi anyqtalǵan.
9 qańtarda kúdikti retinde marqumdardyń kúieý balasy Sultan Sarsemaliev anyqtaldy. Keiin is boiynsha onyń jubaiy da kúdikke ilingen.
Aqpan aiynyń sońynda kúdiktiler Indoneziianyń Lombok aralynda ustalyp, Qazaqstanǵa jetkizildi. Tergeý barysynda Sarsemaliev qylmys jasalǵan oryndy kórsetip, oqiǵanyń mán-jaiyn túsindirgen.
Quzyrly organdar is boiynsha barlyq tergeý amaldarynyń aiaqtalǵanyn, endi sot sheshimi shyǵarylatynyn habarlady.
