Atyraýda áiel men onyń qyzdary otaǵasyn óltirip, týysqandaryn "ol Taiaý Shyǵysqa jihadqa attandy" dep sendirip kelgen, dep habarlaidy Sputnik Qazaqstan.
Jantúrshigerlik qylmys týraly atyraýlyq Viktoriia Shamshodina feisbýktegi paraqshasynda jazdy.
Qyzdyń aitýynsha, 2012 jyly ákesiniń týǵan baýyry, iaǵni aǵasy iz-tússiz joǵalyp ketken. Er adamnyń áieli men qyzdary onyń jat aǵymǵa kirip, shet elge jihadqa attanǵanyn aityp, týysqandaryn osyǵan sendirgen.
Alaida politsiia arada birneshe jyl ótse de, tergeýdi toqtatpaǵan. Birde joǵalǵan er adamnyń áieli men qyzdary politsiiaǵa taǵy bir márte shaǵym túsirgende, ótiriktiń beti ashylady. Habarsyz ketken er adamnyń otbasy týysqandaryn aqsha bopsalady dep aiyptaǵan.
Osy aryzdan keiin ustalǵan jigit politsiiaǵa bar shyndyqty aitady. Ol joǵalǵan er adamnyń shyn máninde shetelge ketpegenin, ony áieli men týǵan qyzdary óltirip, denesin bólshektep, úi aýlasyndaǵy dýshtyń astyna kómip, ústine beton quiyp tastaǵanyn málimdegen.
Politsiia bul aqparatty tekserip, munyń shyndyq ekenine kóz jetkizedi. Quqyq qorǵaý organdarynyń qyzmetkerleri aýladaǵy dýshty buzyp, jerdiń astynan adam denesiniń súiekterin tapqan. Ázirge politseiler onyń naqty kimdiki ekenin aitýǵa asyqpaidy – saraptama nátijesin kútip otyr.
"Atalǵan faktige qatysty sotqa deiingi tergeýdiń bastalǵanyna biraz boldy. Is figýranttary anyqtalyp, ustaldy", — dep málimdedi Atyraý oblysy ishki ister departamenti.
Tergeý múddesine bailanysty oqiǵanyń tolyq mán-jaiy habarlanbai otyr. Vedomstvo tergeý sharalary aiaqtalǵan soń, qosymsha aqparat taratamyz dep sendirdi.
