Atyraý oblysynyń ákimi Mahambet Dosmuhambetov vaktsina saldyrdy, dep habarlaidy "Ult aqparat".
Oblys ákimi koronavirýsqa qarsy vaktsina saldyrý úshin «Geolog» eldi mekenindegi emhanaǵa bardy.
«Dárigerler aldymen tirkeýden ótkizip, dene qyzýym men qan qysymymdy ólsheýden bastap, tolyq meditsinalyq tekserý jasady. Odan keiin ǵana Qaraǵandy farmatsevtika zaýytynda shyǵarylǵan «Spýtnik-V» vaktsinasyn saldyrttym. Vaktsinadan keiin jarty saǵat arnaiy bólmede mamandar baqylaýynda boldym. Qazir jaǵdaiym jaqsy, eshqandai janama áserleri baiqalǵan joq. Mamandar ekpe salynǵan jerge sý tigizbei, jyly ustap, kútinip ári saqtyq sharalaryn ustanyp júrýge keńes berdi» deidi Mahambet Dosmuhambetov.
Ákimniń aitýynsha, jeksenbige qaramastan, emhanaǵa vaktsina alýshylar kelgen.
Al, dárigerler turǵyndardyń vaktsina alýǵa degen belsendiligi joǵary ekenin aityp otyr.
«Jaqyndarymyz ben ainalamyzdaǵylardy qorǵaý da, ózderińizdiń qorǵanýlaryńyz úshin de – koronavirýsqa qarsy vaktsina alý óte mańyzdy» deidi oblys ákimi.
