Atyraý oblysyndaǵy Teńiz ken ornynda bolǵan órttiń sebebi aityldy, dep habarlaidy QazAqparat.
Budan buryn Teńiz ken ornynda merdiger mekemeniń tsehynda órt shyǵyp, 15 qyzmetker qaýipsiz jerge evakýatsiialanǵan.
Keiin órtte bir tehnika janyp ketkeni belgili boldy.
Oblystyq tótenshe jaǵdailar departamenti bastyǵynyń orynbasary, azamattyq qorǵaý polkovnigi Ashat Erjanovtyń málimetinshe, «Nasar Solusion» JShS-niń qaldyqtardy basqarý kesheniniń aýmaǵynda munai qaldyqtary janǵan.
«Bul seriktestiktiń qaldyqtardy basqarý kesheni joǵary táýekeli bar deńgeige jatady. Sol sebepten, byltyrǵy qyrkúiekte seriktestikke tekserý júrgizilip, órt qaýipsizdigi erejeleriniń buzylǵany anyqtaldy. Soǵan bailanysty zańdy tulǵa jaýapkershilikke tartyldy. Al, 1 naýryzda bolǵan órttiń saldarynan «Car» markaly 1 júk kótergish tehnika, 20 konteiner, 70 plastmassa ydys (1 tonna), sondai-aq, 60 metall bóshke (200 litr) janyp ketti. Jalyn sharpyǵan aýmaq 2 800 sharshy metrdi qurady. Órt saǵat 16:40-ta bastalǵan. Oqiǵa ornyna aldymen «Teńizshevroil» JShS-niń órt sóndirý jáne apattyq qutqarý qyzmetinen 17 qyzmetkeri men 4 tehnikasy, «COCR» JShS-nen 6 qyzmetker men 2 tehnika jetti. Keiin saǵat 18:58-de Jylyoi aýdanynyń ortalyǵy – Qulsary qalasynan №9 órt sóndirý bóliminen 12 qyzmetker men 2 tehnika qosyldy. Órttiń boljamdy sebebi – otty abaisyz qoldaný», - deidi Ashat Erjanov.
Onyń aitýynsha, atalǵan nysan biylǵy jyldyń ekinshi toqsanynda erekshe tártip boiynsha tekserýler júrgizý kestesine engiziledi.
