Atyraý oblysynda júk poiyzy 16 qoi men 4 eshkini basyp ketti, dep habarlaidy QazAqparat.
Kóliktegi politsiia departamentiniń baspasóz qyzmeti taratqan aqparatqa qaraǵanda, oqys oqiǵa keshe, 8 jeltoqsanda bolǵan.
«Júk poiyzynyń mashinisi «Qiǵash-Atyraý» ýchaskesindegi №15 razezde temir jol ústinde júrgen qoi-eshkilerdi baiqap, shuǵyl tejeý ádisin qoldandy. Biraq, oqys oqiǵanyń aldyn alý múmkin bolmady. Poiyz 16 qoi men 4 eshkini basyp ketti. Júk poiyzy osynyń saldarynan 12 minýt májbúrli túrde toqtap turdy. Oqiǵa ornyna Atyraý stansasyndaǵy jelilik politsiia bóliminiń jedel-tergeý toby kelip, mán-jaidy anyqtady», - deidi departament bastyǵynyń birinshi orynbasary Qalijan Qoblandin.
Onyń aitýynsha, poiyz astyna túsken maldyń iesi Isatai aýdanyndaǵy Aqqystaý aýylynyń turǵyny bolyp shyqqan. Mal iesine QR Ákimshilik quqyqbuzýshylyq týraly kodeksiniń 559-babynyń 1-bóligimen aiyppul salynǵan.
