Belgili ánshi Móldir Áýelbekova Qazaqstannyń halyq ártisi Maqpal Júnisovamen birge ótkizgen kóńildi sátin kópshilikke kórsetti, dep habarlaidy ult.kz.
Óner iesi Instagram paraqshasynda Maqpal Júnisovamen ázildesip, erkin áńgimelesip otyrǵan sátinen beinejazba jariialady.
Videoda qos ánshiniń bir-birimen qaljyńdasyp, kóterińki kóńil kúide otyrǵanyn baiqaýǵa bolady. Móldir Áýelbekova aǵa býyn ókiline degen qurmeti men jyly yqylasyn da jasyrmaǵan.
"Kóńili kirshiksiz áppaq Maqpal apaiymyzben kóńildi otyrys. Eki daýysta tertsiia bolyp kúldik!" – dep jazdy ánshi.
Jariialanǵan kadrlardan qos óner iesiniń ózara syilastyǵy men jarasymdy ázili ańǵarylady. Ánshilerdiń beiresmi ortadaǵy kóńildi áńgimesi olardyń sahnadan tys ómiriniń bir sátin kórsetti.
Móldir Áýelbekova kim?
Móldir Áýelbekova – qazaqstandyq tanymal estrada ánshisi, aktrisa jáne "KeshYOU" tobynyń burynǵy múshesi. Ol 1986 jyly 10 tamyzda dúniege kelgen. Óner iesi jas kezinen mýzykaǵa qyzyǵýshylyq tanytyp, ánshilik qabiletin damytqan. Móldir Áýelbekova kópshilikke prodiýser Baian Maqsatqyzy jetekshilik etken "KeshYOU" qyzdar toby arqyly keńinen tanyldy. Atalǵan ujymda óner kórsetken jyldary ol qazaqstandyq estradada ózindik qoltańbasyn qalyptastyrdy. Keiin top quramynan shyǵyp, jeke shyǵarmashylyq jolyn bastady.
Ánshi 2004 jyly "SuperStar.kz" mýzykalyq baiqaýynyń ekinshi maýsymyna qatysyp, úzdik ondyqqa endi. Keiin Temirbek Júrgenov atyndaǵy Qazaq ulttyq óner akademiiasynda bilim alyp, 2011 jyly magistratýrany aiaqtady. Móldir Áýelbekova 2010 jyly "Ǵashyq júrek" mýzykalyq filminde basty rólderdiń birin somdap, aktrisa retinde de tanyldy. 2012 jyldan bastap jeke shyǵarmashylyqpen ainalysyp, "Týǵan jer", "Kútemin", "Janym-janym", "Bir sen úshin" jáne "Ósiet" ánderin oryndady. Sonymen qatar ol "Elim meniń" televiziialyq jobasynyń júrgizýshisi boldy. 2018 jyly óner men mádeniet salasyna qosqan úlesi úshin "Qurmet" ordenimen marapattaldy. Ánshi "Nazar" qyzdar tobynyń prodiýseri retinde de eńbek etti. Qazirgi ýaqytta Móldir Áýelbekova jeke shyǵarmashylyǵyn jalǵastyryp, kontsertter men túrli mádeni jobalarǵa qatysyp keledi.
Maqpal Júnisova kim?
Memlekettik syilyqtyń laýreaty. Ol 1964 jyly 11 qańtarda Qaraǵandy oblysynyń Terekti aýylynda dúniege kelgen. Bolashaq ánshi bala kezinen ónerge jaqyn bolyp, mýzykalyq qabiletimen erekshelengen. Almatydaǵy Ahmet Jubanov atyndaǵy respýblikalyq mamandandyrylǵan mýzyka mektep-internatynda bilim alǵan. Keiin Shymkenttegi ál-Farabi atyndaǵy mádeniet institýtyn támamdaǵan. Shyǵarmashylyq jolyn áigili "Gúlder" ansambliniń quramynda halyq ánderin oryndaýdan bastaǵan.
1981 jyly Dnepropetrovsk qalasynda ótken Búkilodaqtyq estrada oryndaýshylary baiqaýyna qatysyp, júldeli orynǵa ie boldy. Keiin "Qazaqkontsert" birlestiginde eńbek etip, "Nazerke" ansambliniń qurylýyna atsalysty. Onyń repertýarynan qazaqtyń halyq ánderimen qatar Shámshi Qaldaiaqov, Áset Beiseýov jáne basqa da belgili kompozitorlardyń shyǵarmalary oryn aldy. "Ǵashyq júrek", "Qyz ǵumyr", "Fariza qyz", "Qoshtasý" jáne "Aqqý sazy" sekildi ánderi tyńdarman arasynda keńinen tanyldy.
Maqpal Júnisova 1994 jyly Qazaqstannyń halyq ártisi ataǵyn ielendi. Al 1999 jyly Qazaqstan Respýblikasynyń Memlekettik syilyǵynyń laýreaty atandy. Óner iesi halyqaralyq mýzykalyq baiqaýlarǵa qatysyp, qazaq ánderin sheteldik sahnalarda da oryndady. 2026 jyly II dárejeli "Barys" ordenimen marapattalǵan ánshi búginde shyǵarmashylyq qyzmetin jalǵastyryp keledi.
