Tanymal ánshi Argonya alǵash ret suhbat berip, Qairat Nurtastyń Astanada ótken kontsertinde bolǵan jaǵdaiǵa qatysty pikir bildirdi. Óner iesi áleýmettik jelide ózine baǵyttalǵan synǵa jaýap berip, sol kúni sahnaǵa qandai jaǵdaida shyqqanyn aitty, dep habarlaidy ult.kz.

Ánshiniń sózinshe, kontsert kúni densaýlyǵy syr berip, dene qyzýy kóterilgen. Soǵan qaramastan, kórermen aldyndaǵy mindetin oryndaý úshin sahnaǵa shyǵýǵa sheshim qabyldaǵan.

“Sol kontsertke biz shynymen qatty aýyryp bardyq. Men qatty aýyryp bardym. Dene qyzýym kóterilip turdy. Shynymdy aitatyn adammyn. Aýyryp turǵannan keiin 100 gramm tartyp jiberdim. Qatty kórinip qaldy dep oilaimyn. Tentirep turǵan joqpyz ǵoi. Basym, qulaǵym barlyǵy dyńyldap turdy”, – dedi ánshi.

Argonya ózin jaisyz sezingenimen, kontsertke qatysýdan bas tarta almaǵanyn jetkizdi. Óitkeni kórermenderge onyń óner kórsetetini aldyn ala habarlanǵan.

“Tyrysyp jatyrsyń, bilep jatyrsyń, biraq densaýlyq qoi. Ishtei sharshap tursyń, biraq seni keledi dep aityp qoiǵan. Qalai sen “joq, barmaimyn” deisiń? Allaǵa shúkir, jandy daýysta aityp shyqtyq”, – dep túsindirdi ol.

Sonymen qatar óner iesi sahnadaǵy ónerine qatysty jaǵymsyz pikirlerge de toqtaldy. Onyń aitýynsha, kontsert kezinde tehnikalyq qolaisyzdyqtar da bolǵan.

“Al heiterler buryn da bolǵan, qazir de bar. Men qulaqqapsyz boldym. Sol da áser etedi. Stadionnyń jańǵyryǵy da ózińe qaityp kelip estiledi”, – dedi Argonya.

Osylaisha, ánshi kontsert kezindegi áreketi men óner kórsetý sapasyna densaýlyǵynyń nasharlaýy jáne sahnadaǵy dybys erekshelikteri áser etkenin jetkizdi.

Aita keteiik, Qairat Nurtastyń kontsertine kelýshiler 18 jastaǵy qyzdy taptap ketken.

Argonya kim?

Argonya (Arǵyn Aýsarov) – qazaqstandyq ánshi, kompozitor, ánderdiń sózin jazatyn avtor. Ol Pavlodar oblysynyń Ekibastuz qalasynda dúniege kelgen. Óner iesi qazaq estradasynda erekshe mýzykalyq baǵytymen jáne ózindik oryndaý mánerimen tanylǵan.

Argonya 2019 jyldan bastap kópshilikke keńinen tanyla bastady. Onyń “Tún”, “Qas-qabaq”, “Búitý kerek edi”, “Qalamaimyn”, “Soǵan qarap” jáne “Seni súiem” ánderi tyńdarman arasynda tanymal boldy. Ánshi shyǵarmalarynyń sózi men áýenin ózi jazyp, mýzykalyq óńdeý jumystaryna da qatysady.

Óner iesi Qairat Nurtas, Tóreǵali Tóreáli, Aiqyn Tólepbergen jáne basqa da qazaqstandyq oryndaýshylarmen birlesip án shyǵarǵan. Ásirese Qairat Nurtaspen oryndaǵan “Maskúnem” áni úlken tanymaldyqqa ie boldy. Bul týyndy YouTube jelisinde milliondaǵan qaralym jinaǵan.

Argonya shyǵarmashylyq jolyn bastaǵan kezde asabalyqpen de ainalysqan. Keiin jeke ánderin shyǵaryp, kásibi mýzyka salasyna den qoiǵan. Ol suhbattarynyń birinde án jazǵanda mátinniń maǵynasyna, áýenniń ereksheligine jáne tyńdarmannyń qabyldaýyna erekshe mán beretinin aitqan.

Ánshiniń anasy Saia Qudaibergenqyzy onyń prodiýseri retinde shyǵarmashylyq jumystaryn uiymdastyrýǵa kómektesedi. Argonya birneshe jyl boiy qazaq estradasynda ánshi ári avtor retinde eńbek etip keledi.