Qazaqstan musylmandary dini basqarmasy din qyzmetkeriniń etikasyn buzǵan eki imamdy jumystan bosatty, dep habarlaidy baspasóz qyzmeti.
QMDB baspasóz qyzmeti habarlaǵandai, Atyraý oblysy Isatai aýdany Aqqystaý aýylynda ornalasqan "Zineden Qurasuly" meshitiniń bas imamy Qurmetqali Baqtyǵulov pen naib imam Qanaibek Saliev din qyzmetkeriniń etikasyn buzǵany úshin jumystan bosatyldy.
QMDB-nyń Atyraý oblysy boiynsha ókildigi atalǵan azamattardyń qyzmet barysynda sóz talastyryp, kelispei qalǵandyǵyn anyqtaǵan.
"Qazaqstan musylmandary dini basqarmasynyń baspasóz qyzmeti buqaralyq aqparat quraldary men áleýmettik jeli qoldanýshylaryn 2017 jyldyń 22 mamyrynda bolyp ketken oqiǵa týraly obektivti aqparat berýge shaqyrady", — delingen habarlamada.
Aita keteiik, buǵan deiin Atyraý oblysy Isatai aýdany "Zineden ata" meshitinde el aldynda bas imammen jaǵa jyrtysqan naib imamǵa sot aiyppul saldy dep habarlaǵan edik.
"Sot otyrysynda naib imam óz kinásin moiyndap, bas imamnan keshirim surady. Sot úkimimen quqyq buzýshy aiypty dep tanylyp, oǵan 10 AEK kóleminde aiyppul salyndy", — degen aqparat taratqan edi Isatai aýdandyq sotynyń baspasóz qyzmeti.
