Atyraý oblysynda ornalasqan "Teńiz" munai ken ornynyń qyzmetkerleri de narazylyqqa shyqty, dep habarlaidy Sputnik Qazaqstan.
Munaishylardyń mańǵystaýlyqtardy qoldap narazylyqqa shyqqan sátiniń videosy áleýmettik jelide jariialandy.
Áleýmettik jelilerdegi videodan munai-gaz óndiretin kompaniia aýmaǵynda júzdegen er adamnyń arnaiy jumys kiiminde bir baǵytqa qarai qozǵalyp bara jatqanyn kórýge bolady.
"Teńiz – ereýil. Mańǵystaýdy qoldaimyz!", dep urandatyp jatyr narazylyq bildirýshiler. Sondai-aq olar Qazaqstannyń memlekettik Ánuranyn hormen oryndap jatyr.
Atyraý oblysy politsiia departamenti ereýil týraly aqparatty rastamady, biraq joqqa da shyǵarmady. Oqiǵaǵa bailanysty keiinirek túsinikteme berýge ýáde berdi.
Sodan keiin Sputnik Qazaqstan oqiǵaǵa bailanysty "Teńizshevroil" munai óndiretin kompaniianyń baspasóz qyzmetimen bailanysqa shyqty, kompaniia ókilderi jaqyn arada túsinikteme beretinin jetkizdi.
Mańǵystaýdaǵy narazylyq
Buǵan deiin suiytylǵan gaz baǵasynyń kúrt kóterilýine narazy Mańǵystaý oblysynyń turǵyndary birqatar eldi mekenderde, sonyń ishinde Jańaózen men Aqtaýda narazylyqqa shyqty.
Oǵan avtokólikke janarmai quiý úshin gazdyń quny eki esege – litrine 120 teńgege deiin óskeni sebep bolǵan. Turǵyndar baǵany 60 teńgege deiin tómendetýdi talap etti.
Qazaqstannyń energetika ministrligi gaz baǵasyn endi suranys pen usynysqa sáikes naryqtyń ózi qalyptastyratynyn túsindirdi. Ákimdik gaz baǵasyn retteýge aralaspaidy, óitkeni bul básekelestik týdyratyn taýar sanalady. Jeke kásipkerler tarapynan baǵany negizsiz kóterý faktileri týyndaǵan jaǵdaida, básekelestikti qorǵaý agenttiginiń departamenti ákimshilik sharalar qabyldaidy.
2-3 qańtarǵa qaraǵan túni prezident Qasym-Jomart Toqaev Twitter-de úkimetke Jańaózendegi jaǵdaidy shuǵyl túrde qarastyrýdy tapsyrǵanyn jazdy. 4 qańtarda quramynda prezident ákimshiliginiń qyzmetkerleri bar úkimettik komissiia Aqtaýda jumysqa kiriskenin habarlady.
Respýblikalyq operativtik shtab turaqty negizde jumys istep jatyr. Komissiiaǵa elimizdegi turaqtylyqty saqtai otyryp, týyndaǵan másele boiynsha ózara tiimdi sheshim shyǵarý júkteldi, dedi prezident.
