Atyraý oblysynda Miialy qorǵanynan teńdesi joq temir saýytty jaýynger tabyldy, dep habarlaidy "Ult aqparat" oblystyq kommýnikatsiialar qyzmetine silteme jasap.
Oblystyq tarihi ólketaný mýzeii mamandary Qyzylqoǵa aýdanyndaǵy Miialy qorǵandar tobynynyń 3-qorǵanyna jasaǵan arheologiialyq qazba jumystary barysynda qarý-jaraǵymen jerlengen jaýyngerdi tapty.
Atyraý oblysynyń ákimi Mahambet Dosmuhambetov tarihi-ólketaný mýzeiine arnaiy baryp, jaýyngerdiń súiegin kórdi.
«Basynan aiaǵyna deiin óte erekshe úlgidegi temir saýytpen jabdyqtalǵan adam qańqasynyń uzyndyǵy - 175 sm. Al tabylǵan qabirdiń uzyndyǵy – 2 m 40 sm, eni - 80 sm. Sondai-aq, múrdemen birge uzyndyǵy 1 metr bolatyn semseri, jebe ushtary men qoramsaǵy, qalqany, patera, at ábzelderi jáne taǵy da basqa kóptegen jádigerler tabylǵan. Zertteý jumystary halyqaralyq dárejedegi qalpyna keltirýshi, «Qyrym araly» ǵylymi-zertteý ortalyǵynyń basshysy Qyrym Altynbekovtiń basshylyǵymen júrgizilýde», delingen habarlamada.
Qyrym Altynbekovtiń aitýynsha, mundai tarihi jádiger óte sirek kezdesedi.
«Tabylǵan súiekti «temir adam» dep ataýymyzǵa da bolady. Óitkeni ol basynan aiaǵyna deiin temir saýytpen jabdyqtalǵan. Ári erekshe úlgide. Soǵan qaraǵanda, jaýynger bolýy ábden múmkin. Bizdi tań qaldyrǵany – temir saýyttyń urlanbai saqtalǵany. Mundai dúnielerdiń myńdaǵan jyldar boiy saqtalýy – óte sirek kezdesetin jaǵdai. Qazaqstanda dál osy ispettes tarihi qundylyq áli birde-bir ret tabylǵan joq», - dedi Qyrym Altynbekov.
Tabylǵan tarihi qundylyqqa jasalatyn zertteý jumystary áli birneshe jylǵa sozylýy múmkin. Óitkeni rentgen jáne metall izdegish qurylǵylardyń kómegimen júrgizilgen zertteý nátijesinde altyn, kúmis, temir, súiekten jasalǵan buiymdardyń bar ekeni anyqtalǵan. Antropologiialyq, DNK-lyq zertteýlerdiń qorytyndysy boiynsha aldaǵy ýaqytta múrdeniń bas súiegi men saýytyn qalpyna keltirý josparlanyp otyr.
«Áli tazalaimyz, jádigerlerdiń árqaisysyna bólek bólek ádis jasap, analizge daiyndaimyz. Oǵan ýaqyt kóp ketedi. Sonyń negizinde talai qazbalar shyǵýy múmkin. Buǵan deiin Qazaqstanda temir saýytpen adam shyqpaǵandyǵyn eskersek, múrde tolyqtai qalpyna keltirilgende, tek Atyraýdyń ǵana emes, búkil Qazaqstannyń maqtanyshy bolary sózsiz», - dep atap ótti Qyrym Altynbekov.
