Atyraý oblysy ákiminiń orynbasary Baqytgúl Hamenova para aldy degen kúdikke ilindi, dep habarlady "Ult aqparat" "Aq jaiyq" portalyna silteme jasap.
Basylymnyń málimetinshe, búgin, 10 jeltoqsanda Atyraý oblysy ákiminiń orynbasary Baqytgúl Hamenova men oblystyq mádeniet basqarmasynyń basshysy Aqylbek Rysqaliev 4 mln 500 myń teńge kóleminde para aldy degen kúdikpen ustaldy.
"Olardy Nur-Sultan qalasynan Atyraýǵa arnaiy kelgen jemqorlyqqa qarsy is-qimyl agenttiginiń toby ustady. Aldyn ala málimet boiynsha, para tenderge qatysty alynǵan", - dep jazdy basylym.
Keibir derekkóz boiynsha bul – Abai eskertkishin ornatý boiynsha 150 million teńgeniń tenderi úshin berilgen para. Bul 15 million teńgeniń (10%) birinshi transhy bolǵan.
Sondai-aq, jelidegi paraqshalardyń birinde Baqytgúl Hamenovanyń kabinetiniń mórlengen esiginiń sýreti jariialandy.
Aita keteiik, buǵan deiin Atyraý oblysy ákiminiń orynbasary Qairat Nurlybaev biýdjet qarajatyn ysyrap etti degen kúdikke ilingen bolatyn.
Qairat Nurlybaev biýdjet qarajatyn ysyrap etý faktisi boiynsha kúdikti dep tanyldy. Ol "Buiyrǵyn" aýyl sharýashylyǵy óndiristik kooperativine 83,7 million teńge kóleminde investitsiialyq sýbsidiiany zańsyz tólegen.
