Atyraý qalasynyń jańa ákimi taǵaiyndaldy, - dep habarlaidy "Ult aqparat".
Prezident Ákimshiliginiń kelisimine sáikes oblys ákimi Mahambet Dosmuhambetovtiń ókimimen Atyraý qalasynyń ákimi laýazymyn Meiirim Qalaýi atqaratyn boldy.
Meiirim Qalaýi 1985 jyly Atyraý oblysynyń Qyzylqoǵa aýdanynda dúniege kelgen. 2006 jyly "memlekettik jáne jergilikti basqarý" mamandyǵy boiynsha Atyraý memlekettik ýniversitetin, 2010 jyly RF Prezidenti janyndaǵy Resei Memlekettik qyzmet akademiiasyn bitirgen. Ekonomika ǵylymdarynyń magistri.
Eńbek jolyn 2006-2007 jyldary "Atyraý-Aqparat" KMK bastaǵan.
2010-2011 jyldary "Turan" JShS direktory, "Qazaqstan" RTRK Atyraý oblystyq filialynda direktordyń orynbasary - bas redaktor qyzmetterin atqarǵan.
2011-2012 jyldary "Atyraý-Aqparat" KMK direktory bolǵan. 2012-2016 jyldary Atyraý oblysynyń Jastar isi jónindegi basqarmasyn basqardy.
2016-2019 jyldary oblys ákimi apparaty basshysynyń orynbasary, Atyraý qalasy ákiminiń orynbasary bolyp jumys istegen.
Sondai-aq, Nur Otan (Amanat) partiiasynyń Jas Otan Jastar qanatynyń Atyraý oblystyq filialynyń hatshysy qyzmetin atqarǵan.
2019-2021 jyldary Inder aýdanynyń ákimi, 2021-2022 jyldary «Nur Otan» partiiasy Atyraý oblystyq filialy tóraǵasynyń birinshi orynbasary bolǵan.
