Qorǵanys ministri general-leitenant Nurlan Ermekbaev Ekinshi dúniejúzilik soǵystyń ardageri, Eki márte Keńes Odaǵynyń batyry, aviatsiia general-maiory Talǵat Bigeldinovke arnalǵan eskertkishtiń ashylý rásimine qatysty, dep habarlaidy QR QM baspasóz qyzmeti.
Atalǵan eskertkish Uly Otan soǵysyndaǵy Jeńistiń 76 jyldyǵyn merekeleý qarsańynda Nur-Sultan qalasy Saryarqa dańǵylynyń boiynda ashyldy. Saltanatty sharaǵa Talǵat Bigeldinovtyń qyzdary Galina men Raihan, elorda ákimi Altai Kólginov, Parlament Májilisiniń depýtaty Baqytbek Smaǵul, Qarýly Kúshterdiń ardagerleri, qoǵam qairatkerleri, «Jas sarbaz» balalar-jasóspirimder qozǵalysynyń ókilderi men áskeri qyzmetshiler qatysty.
– Talǵat Jaqypbekuly Bigeldinovtyń búkil sanaly ǵumyry -eren erlik pen batyldyqtyń, kásibi sheberlik pen Otanǵa adaldyqtyń úlgisi. Soǵys jyldary ol IL-2 shabýyldaýshy ushaǵymen 305 ret ushty. Osy 500 saǵattyq ushý kezinde ushqysh eń jaýapty tapsyrmalardy buljytpai oryndady. Batyldyǵy men erligi úshin Lenin, Qyzyl Tý, Aleksandr Nevskii, Qyzyl Juldyz, III dárejeli Dańq, I jáne II dárejeli Otan soǵysy ordenderimen marapattaldy, eki ret Keńes Odaǵynyń Batyry ataǵyna laiyq dep tanyldy, – dedi qorǵanys ministri.
Elordada áigili ushqyshqa eskertkishtiń ashylýy alapat maidanda erlikpen shaiqasyp, tylda jeńisti jaqyndatqan ardagerlerge qurmet kórsetip, olardyń erlik jolyn máńgi este saqtaityn urpaq sabaqtastyǵyn kórsetedi.
Jeńis jolynda óz ómirin qaýip-qaterge tigip, surapyl soǵystyń alapat maidanynan ótken Talǵat Bigeldinovtyń erlikteri el tarihyna máńgi saqtalady.
Soǵystan keiingi jyldary ol áskeri jáne azamattyq aviatsiiada jumys istedi, qoǵamdyq qyzmetpen ainalysty. Táýelsizdik jyldary Qazaqstan Qarýly Kúshteriniń qalyptasýy men damýy jolynda, jastardy áskeri-patriottyq tárbieleý maqsatynda belsendi jumys júrgizdi
Búginde Áýe qorǵanysy kúshteriniń Áskeri institýty men Qaraǵandy «Jas ulan» respýblikalyq mektebi batyr ushqyshtyń berilgenin maqtan etedi. Atalǵan oqý oryndarynyń aýmaǵynda aty ańyzǵa ainalǵan batyrǵa eskertkishter ornatylǵan. Kýrsanttar men ulandar batyrdyń ǵumyry men jaýyngerlik jolyn úlgi etedi.
