Almatyda 12 aqpan kúni tańerteń Aýǵanstan soǵysynyń ardageri, arnaiy maqsattaǵy 177-shi otriadtyń komandiri, otstavkadaǵy polkovnik, Qara maior degen atpen belgili Boris Kerimbaev uzaqqa sozylǵan dertinen qaitys boldy, dep jazady Sputnik agenttigi.
Boris Kerimbaev Keńes áskeriniń Aýǵanstan aýmaǵynan shyǵarylýynyń 30 jyldyǵy qarsańynda, 71 jasqa tolǵannan keiin bir ai ótken soń ómirden ozdy.
Aty ańyzǵa ainalǵan Qara maior týǵan kúnin aýrýhanada aýyr syrqatynan emdelip jatyp ótkizgen edi.
11 aqpanda Qara maiordyń palatasynda Qazaqstannyń qorǵanys ministri Nurlan Ermekbaev boldy. Ol Boris Kerimbaevty keńes áskeriniń Aýǵanstan Demokratiialyq Respýblikasynan shyǵarylýynyń 30 jyldyǵymen quttyqtap, QR áskeri barlaýy aldyndaǵy eńbegi úshin "Altyn úki" tós belgisin taqty, dep habarlady Qazaqstannyń qorǵanys ministrligi.
Ardagerdiń qazasy týraly aqparatty Almaty qalasy qorǵanys isteri departamenti men aýǵan ardagerleriniń uiymdary rastady.
Boris Kerimbaev Almaty oblysy Prýdki aýylynda 1948 jyly 12 qańtarda dúniege keldi.
1970 jyly V. Lenin atyndaǵy Tashkent joǵary áskeri komandalyq ýchilisheni támamdaǵan. Ofitserlik qyzmetin Germaniiadaǵy keńes áskeri tobynda motoatqyshtar vzvodynyń komandiri bolyp bastady, al úsh jyldan soń barlaý rotasynyń komandiri bolyp taǵaiyndaldy. 1975 jyly Orta Aziia áskeri okrýgine aýystyrylǵan.
1980 jyly Kerimbaev Almaty oblysynyń Qapshaǵai qalasynda Orta Aziia áskeri okrýginiń arnaiy maqsattaǵy 22-shi jeke brigadasy bazasynda qurylǵan arnaiy maqsattaǵy 177-shi otriadynyń komandiri bolyp taǵaiyndalyp, 1981 jyly Aýǵanstanǵa attanady.
Meimen qalasynda Boris Kerimbaev qolbasshylyq etken otriad aýǵan komandiri Movladi-Karanyń áskerin oisyrata jeńgennen soń, komandirdi qara tory kelbetine bailanysty Qara maior dep atap ketken.
1983 jyly besinshi jeltoqsanda Boris Kerimbaev 177-shi otriadtyń komandiri laýazymyn tapsyryp, ári qarai qyzmetin Orta Aziia áskeri okrýginde jalǵastyrdy. 1992 jyly polkovnik shenimen otstavkaǵa shyqty.
