الماتىدا 12 اقپان كٷنٸ تاڭەرتەڭ اۋعانستان سوعىسىنىڭ ارداگەرٸ, ارنايى ماقساتتاعى 177-شٸ وتريادتىڭ كومانديرٸ, وتستاۆكاداعى پولكوۆنيك, قارا مايور دەگەن اتپەن بەلگٸلٸ بوريس كەرٸمباەۆ ۇزاققا سوزىلعان دەرتٸنەن قايتىس بولدى, دەپ جازادى Sputnik اگەنتتٸگٸ.
بوريس كەرٸمباەۆ كەڭەس ەسكەرٸنٸڭ اۋعانستان اۋماعىنان شىعارىلۋىنىڭ 30 جىلدىعى قارساڭىندا, 71 جاسقا تولعاننان كەيٸن بٸر اي ٶتكەن سوڭ ٶمٸردەن وزدى.
اتى اڭىزعا اينالعان قارا مايور تۋعان كٷنٸن اۋرۋحانادا اۋىر سىرقاتىنان ەمدەلٸپ جاتىپ ٶتكٸزگەن ەدٸ.
11 اقپاندا قارا مايوردىڭ پالاتاسىندا قازاقستاننىڭ قورعانىس مينيسترٸ نۇرلان ەرمەكباەۆ بولدى. ول بوريس كەرٸمباەۆتى كەڭەس ەسكەرٸنٸڭ اۋعانستان دەموكراتييالىق رەسپۋبليكاسىنان شىعارىلۋىنىڭ 30 جىلدىعىمەن قۇتتىقتاپ, قر ەسكەري بارلاۋى الدىنداعى ەڭبەگٸ ٷشٸن "التىن ٷكٸ" تٶس بەلگٸسٸن تاقتى, دەپ حابارلادى قازاقستاننىڭ قورعانىس مينيسترلٸگٸ.
ارداگەردٸڭ قازاسى تۋرالى اقپاراتتى الماتى قالاسى قورعانىس ٸستەرٸ دەپارتامەنتٸ مەن اۋعان ارداگەرلەرٸنٸڭ ۇيىمدارى راستادى.
بوريس كەرٸمباەۆ الماتى وبلىسى پرۋدكي اۋىلىندا 1948 جىلى 12 قاڭتاردا دٷنيەگە كەلدٸ.
1970 جىلى ۆ. لەنين اتىنداعى تاشكەنت جوعارى ەسكەري كوماندالىق ۋچيليششەنٸ تەمامداعان. وفيتسەرلٸك قىزمەتٸن گەرمانيياداعى كەڭەس ەسكەرٸ توبىندا موتواتقىشتار ۆزۆودىنىڭ كومانديرٸ بولىپ باستادى, ال ٷش جىلدان سوڭ بارلاۋ روتاسىنىڭ كومانديرٸ بولىپ تاعايىندالدى. 1975 جىلى ورتا ازييا ەسكەري وكرۋگٸنە اۋىستىرىلعان.
1980 جىلى كەرٸمباەۆ الماتى وبلىسىنىڭ قاپشاعاي قالاسىندا ورتا ازييا ەسكەري وكرۋگٸنٸڭ ارنايى ماقساتتاعى 22-شٸ جەكە بريگاداسى بازاسىندا قۇرىلعان ارنايى ماقساتتاعى 177-شٸ وتريادىنىڭ كومانديرٸ بولىپ تاعايىندالىپ, 1981 جىلى اۋعانستانعا اتتانادى.
مەيمەن قالاسىندا بوريس كەرٸمباەۆ قولباسشىلىق ەتكەن وترياد اۋعان كومانديرٸ موۆلادي-كارانىڭ ەسكەرٸن ويسىراتا جەڭگەننەن سوڭ, كومانديردٸ قارا تورى كەلبەتٸنە بايلانىستى قارا مايور دەپ اتاپ كەتكەن.
1983 جىلى بەسٸنشٸ جەلتوقساندا بوريس كەرٸمباەۆ 177-شٸ وتريادتىڭ كومانديرٸ لاۋازىمىن تاپسىرىپ, ەرٸ قاراي قىزمەتٸن ورتا ازييا ەسكەري وكرۋگٸندە جالعاستىردى. 1992 جىلى پولكوۆنيك شەنٸمەن وتستاۆكاعا شىقتى.
