Qorytyndy attestattaý emtihandaryn jáne sońǵy qońyraý saltanatty jiynyn ótkizbeý kerek. Bul týraly Májilistiń jalpy otyrysynda depýtat Juldyz Súleimenova málim etti, dep habarlaidy "Ult aqparat".
«Elimizde 28 mamyrdan bastap 9, 11 synyp oqýshylary úshin qorytyndy attestattaý emtihandary bastalady. Biyl 9-synypta 264 myńnan astam oqýshy 3 emtihan tapsyrsa, al 11-synypta 154 816 oqýshy 4 emtihan tapsyrady», - dedi depýtat Premer-ministrdiń orynbasary Eraly Toǵjanovtyń atyna joldaǵan saýalynda.
Onyń paiymynsha, emtihan tapsyrý jabyq ǵimarattarda ótkizilýine bailanysty, oqýshylardyń, pedagogtar men tehnikalyq personaldyń koronovirýs juqtyrý yqtimaldyǵy joǵary.
«Jabyq keńistikterde uzaq emtihandar ótkizý qanshalyqty qisyndy bolmaq? Búginniń ózinde, oqýshylar arasynda koronovirýs faktilerdiń oryn alýyna bailanysty, qorytyndy attestattaý emtihandaryn jáne sońǵy qońyraý saltanatty jiynyn ótkizbeý kerek dep sanaimyz. Bul ata-analar tarapynan úlken alańdatýshylyqty týdyrýda. Budan ózge, oqýshylardyń jáne muǵalimderdiń densaýlyǵy basty nazarda bolýy qajet», - dedi Juldyz Súleimenova.
Osy oraida, Nur Otan partiiasy fraktsiiasynyń depýtattary kelesi usynystardy engizdi:
Birinshiden, oqýshylardyń, muǵalimder men ata-analar qoǵamdastyǵynyń densaýlyǵyn saqtaý, COVID virýsynyń aldyn alý maqsatynda Bilim jáne ǵylym ministrligine 9, 11 synyp oqýshylary úshin memlekettik qorytyndy attestattaý emtihandaryn ótkizbeý týraly sheshim qabyldaý usynyldy.
«Indettiń aldyn alýda bul mańyzdy. Jalpy, mundai tájiribe qoldanysta bar. Byltyr koronovirýs pandemiiasyna bailanysty QR Bilim jáne ǵylym ministriniń 2020 jylǵy 3 sáýirdegi 129 buiryǵyna sáikes 9, 11 synyptarǵa qorytyndy attestattaý emtihandary bolmady. Sáikesinshe, qorytyndy baǵalar oqý jylynyń toqsandyq baǵalary negizinde qoiyldy», - dedi depýtat.
Ekinshiden, 9, 11 synyptarda qorytyndy attestattaý ótkizý pandemiia jáne qashyqtan oqytý jaǵdaiyna ikemdi etýge qatysty tiisti zańnamalyq normativtik aktilerge ózgerister engizý jáne retteý usynyldy.
«Úshinshiden, 6 mamyrda UBT bastalǵany barshamyzǵa belgili. Osy oraida, jergilikti atqarýshy bilik organdary Bas sanitarlyq dárigerlermen birlesip, UBT tapsyrý pýnkterinde sanitarlyq-epidemiologiialyq talaptardyń saqtalýyna qatysty monitoring toptary jumysynyń tiimdiligin arttyrýdy óz jaýapkershiligine alýy qajet dep sanaimyz», - dedi ol.
