Biyl atmosferalyq aýa sapasyn baqylaý úshin 30 yqsham avtomatty stansa iske qosylady. Bul týraly Ekologiia, geologiia jáne tabiǵi resýrstar ministrliginiń keńeitilgen alqa májilisinde osy vedomstvonyń vitse-ministri Ahmetjan Pirimqulov málim etti, dep habarlaidy "Ult aqparat".
«Ózderińizge belgili, ekologiialyq problemalardy júieli sheshý úshin biyldyń basynda Memleket basshysy jańa redaktsiiadaǵy Ekologiia kodeksine qol qoidy. Bul ministrliktiń sońǵy eki jylda atqarǵan jumysynyń nátijesi. Eldi tolǵandyratyn máselelerdiń biri – atmosferalyq aýanyń sapasy. Atmosferalyq aýany taldaý 2020 jyly 45 eldi mekende, 140 baqylaý beketinde júrgizildi. Biyl atmosferalyq aýa sapasyn baqylaý úshin 30 yqsham avtomatty stansany alý josparda bar. Bul el aýmaǵyn 100 paiyz qamtýǵa jáne halyqty shynaiy aqparatpen qamtamasyz etýge múmkindik beredi», - dedi A. Pirimqulov.
Onyń aitýynsha, jerústi sýlarynyń jai-kúiine monitoring 143 sý nysanynda, sonyń arasynda 93 ózende, 31 kólde, 15 sý qoimasy, 3 arnada jáne bir teńizde júrgizildi. Syrdariia, Eginsý, Qatta-Bógen ózenderiniń sý sapasynyń nasharlaýy baiqaldy.
