Kólik politseileri Atbasardaǵy zaýyt direktory orynbasarynyń týǵan kún keshin tarqatty, dep habarlaidy "Ult aqparat" kóliktegi politsiia departamentine silteme jasap.
«Quqyqtyq tártip» jedel-profilaktikalyq shara barysynda Nur-Sultan stantsiiasyndaǵy jelilik politsiia basqarmasynyń qyzmetkerleri Atbasar stantsiiasy politsiia qyzmetkerlerimen birge karantin kezinde uiymdastyrylǵan týǵan kún sharasyn toqtatty. Bul týraly k óliktegi politsiia departamenti bastyǵynyń birinshi orynbasary Qalijan Qoblandin aitty.
Onyń aitýynsha, «Qamqor-Lokomotiv» JShS Atbasar elektrovoz jóndeý zaýyty filialy aýmaǵynda ornalasqan ashanada bir top adam AEJZ direktory orynbasarynyń týǵan kúnin atap ótpek bolǵan.
Týǵan kún toilaýǵa 17 adam kelgen, onyń ishinde joǵaryda atalǵan kásiporynnyń basshysy da bolǵan.
Mereke toqtatyldy. Qazirgi ýaqytta atalǵan fakti boiynsha material kóliktegi sanitariialyq-epidemiologiialyq baqylaý departamentine berilgen.
«Sonymen qatar, karantin kezinde týǵan kún uiymdastyrýǵa ruqsat bergen ashana ieleri de eldiń bas memlekettik sanitar dárigeriniń talaptaryn eskermegeni úshin, sondai-aq Aqmola oblysy bas memlekettik sanitar dárigeriniń 10 qarashadaǵy qaýlysyn buzǵany úshin tiisti jaýapkershilikkke tartylmaq», – dep tolyqtyrdy politsiia polkovnigi.
Esterińizge sala keteiik, jyl basynan beri kólik politseileri elimizdiń áýe jáne temirjol kólik nysandarynda ákimshilik quqyq buzǵan 39 myńnan asa azamatty anyqtaǵan, onyń ishinde 242 azamat karantindi buzǵan.
