Ulttyq kásipkerler palatasy kommertsiialyq nysandy nemese múlikti jalǵa berip otyrǵan kásipkerlerge ótinish bildirip, olardy shaǵyn biznes ókilderin qoldaýǵa shaqyrdy, dep habarlaidy QazAqparat.
«Atameken» ulttyq kásipkerler palatasynyń kásipkerlerdi quqyqtyq qorǵaý departamentiniń direktory Shyńǵys Temirdiń aitýynsha eki aptadan beri palataǵa ártúrli másele boiynsha kásipkerlerden 11 myń ótinim kelip túsken. Eń jii túsken suraqtardyń jaýabyn Atameken.kz saitynan tabýǵa bolady. Kásipkerler dál osy saitqa jáne 1432 qysqa nómirine habarlasyp, suraqtaryn qaldyra alady.
«Biznes bizge qandai másele boiynsha júginip otyr? Kásipkerlerdi mazalaityn mańyzdy máseleniń biri – jalǵa alynǵan nysan nemese múlik boiynsha tólem. Iaǵni, jalǵa alýshy men jalǵa berýshiniń arasyndaǵy problema. Suraqtardyń 60 paiyzyna jýyǵy osy másele tóńireginde kelgen. Olardyń ishinde 86 paiyzy shaǵyn biznes, 12 paiyzy orta jáne 2 paiyzy iri biznes ókilderinen keldi. 62 paiyzy qyzmet kórsetý salasynyń ókilderi. Iaǵni, engizilgen shekteýlerden zardap shekkenderdiń alǵashqy leginde osylar tur», - dedi Shyńǵys Temir Facebook paraqshasynda tikelei efirden.
Departament direktory qandai jaǵdaida kásipker «Atameken» palatasyna júgine alatynyn aityp ótti.
«Palata qazir jalǵa alýshy men jalǵa berýshi arasyndaǵy problemany mediatsiia arqyly sheshýge bolatyn alańdy qurdy. Ol qalai jumys isteidi? Jalǵa memlekettik nemese kvazimemlekettik sektordyń nysany, bolmasa kommertsiialyq múlik berilýi múmkin. Iaǵni biznes ókili kelesi biznes ókilinen nysandy jalǵa alýy yqtimal. Memlekettik múlikti jalǵa alý máselesi tolyǵymen sheshildi dep aitýǵa bolady. Onda másele joq. Memlekettik komissiianyń otyrysynda Prezident ákimdikterge «20 naýryzdan bastap 3 aiǵa deiin ShOB sýbektileriniń memlekettik múlikti jalǵa alý boiynsha tólemnen bosatylýy kerektigin» tapsyrdy. Ol úshin memlekettik múlik portalyna (Gosreestr.kz) kirip, elektrondy tsifrly qoltańba arqyly jalǵa alý kelisimine qosymsha kelisim jasaý kerek. Osy qujat arqyly siz jalǵa alý tóleminen 3 aiǵa bosatylasyz», - deidi ol.
Al kommertsiialyq múlik boiynsha departament direktory birshama másele baryn moiyndady.
«Bir jaǵynan jalǵa berýshiniń úshinshi tulǵanyń nemese kommnýaldyq qyzmettiń, biýdjeti men jumyskerleriniń, banktiń aldyndaǵy óz mindettemesi bar. Ekinshiden kirisi joq kásipker jalǵa alyp otyrǵan orny úshin aqsha tóleýi tiis. Mundai jaǵdaida siz «Atameken» palatasynyń jergilikti filialyna júginýge nemese 1432 nómirine habarlasýǵa bolady. Biz qazir jalǵa berýshi men jalǵa alýshylardy bir alańǵa jinap, mediatsiialyq kelissózder arqyly problemany eńsergimiz keledi. Qazir memleket kásipkerlerge birshama jeńildik usyndy. Ol jeńildikterge jalǵa berýshiler de ilinýde. Ol qoldaý sharalarynyń ishinde salyqtyń keibir túrinen bosatý, nesieni keiinge shegerý, ailyǵy tómen otbasylarǵa tólem berý jáne kommýnaldyq tólemderdi shegerý tetikteri bar. Iaǵni tiisti mehanizmniń bári bizde bar», - deidi ol.
Shyńǵys Temir bul máseleni sheshýdi Prezident óńirdegi ákimderge de tapsyryp otyrǵanyn jetkizdi.
«Biz qazir jalǵa berýshilerge ótinish bildirgimiz keledi: búkil eldiń amandyǵy birlikke súienip turǵan kezeńde shaǵyn biznes teńdessiz soqqy alyp otyr. Mundai jaǵdaida jalǵa berýshi bizneske kómek kórsetýi kerek. Álbette nesie men basqa da mindettemeler bar. Jalǵa berýshi óz shyǵynyn da jabý kerek. Áitse de biz de olarǵa kómektesýge daiynbyz. Eger sizderdiń bankte problemańyz bolsa ony sheship berýge tyrysamyz. Salyqtan qiyndyǵyńyz bolsa ol salada sizge kómek qolyn sozatyn mamandarymyz bar. Eger sizder jumyskerlerińizdi aqysyz demalysqa jiberýge májbúr bolsańyzdar, bul rette de olarǵa minimaldy ailyq berý máselesimen ainalysýǵa ázirmiz. Qandai máselemen betpe-bet kelseńizder de sizder shaǵyn bizneske júktemeni azaitamyn deseńizder, qoldaýǵa barynsha daiynbyz», - dedi ol.
