Zoom formatynda «Atameken» QR Ulttyq kásipkerler palatasyn transformatsiialaý jónindegi jumys tobynyń birinshi otyrysy ótti, dep habarlaidy QazAqparat.
Otyrysta talqylanǵan máseleniń biri – palatanyń jumysyn saqtap qalý boldy.
Palatanyń Almatydaǵy óńirlik keńesiniń basshysy Maksim Baryshevtiń aitýynsha, UKP jumysyn jalǵastyrý týraly másele óńirdegi sezdiń kún tártibinde bolǵan.
«Barlyǵy bir aýyzdan UKP-ny qaldyryp, ony reformalaý kerek dep daýys berdi. Búgin de sharamyzdy jalǵastyrý úshin osyndai máseleni daýysqa shyǵarýdy usynamyn»,-dedi ol onlain-kezdesýde.
Sonymen birge, Qaitalama metallýrgiia ónerkásipshileri odaǵynyń tóraǵasy Vladimir Dvoretskii de mundai taqyryptyń kóterilýine negiz bar ekenin, sondyqtan jan-jaqty taldaý júrgizý qajettigin aitty.
«Meniń oiymsha, qazir elde múmkindikter terezesi paida boldy, biz ony mindetti túrde paidalanýymyz kerek. Qazir renjitin ýaqyt emes, barlyq faktilerdi jaiyp salyp, tiisti sheshimder qabyldanýy kerek, qazir kúsh salsaq, bir jyldan keiin múldem basqa elge ainalarymyzǵa senimdimin», - dedi V. Dvoretskii.
Óz kezeginde «Atameken» UKP Basqarma tóraǵasy Abylai Myrzahmetov Palatany qaldyrý týraly sheshimdi joǵary organ retinde Sezd qabyldaitynyn túsindirdi. Onyń aitýynsha, Sezdi shaqyrý naýryzdyń ekinshi bóligine josparlanǵan.
Óńdeý ónerkásibi odaǵynyń basshysy Ádilbek Bektibaev Sezde palatany maqtap, ony saqtap qalýdy ǵana suramai, biznes úshin qandai jumys istegenin de aitý kerek degen pikir bildirdi.
«Palata biznes úshin eshteńe jasamady dep oilaityndar bar. Men onda obektivti ashyq pikirler bolǵanyn jáne eki taraptyń da tyńdalǵanyn qalaimyn», - dedi Á. Bektibaev.
Jalpy «Atameken» Ulttyq kásipkerler palatasyn transformatsiialaý jónindegi jumys tobyna barlyq óńirden 89 adam, onyń ishinde kásipkerler, túrli salalardaǵy salalyq komitetterdiń ókilderi kirdi. Qazirgi ýaqytta olar UKP-ny transformatsiialaý boiynsha 360 usynys jinady. Talqylanǵan taqyryptar qatarynda UKP qurylymy men qyzmeti, qaýymdastyqtardy akkreditteý rásimderin jetildirý, normativtik-quqyqtyq aktilerdi saraptaý, múshelik jarnalar men aqyly qyzmetterdi engizý boiynsha usynystar bar. Sondai-aq, jumys tobyna kásipkerlerden biznestiń 400-ge jýyq problemalyq máseleleri joldanǵan.
