Qyrǵyzstannyń burynǵy basshysy Almazbek Atambaev bul pikirin 17 naýryzda Bishkekte ótken Aqsy oqiǵasynda qurban bolǵandardy eske alý sharasynda aitqan.
“Ómir boiy otbasylyq avtoritarlyq rejimmen kúrese júrip, ishin kórmei, syrtyn ǵana kórip, osyndai adamdy bilikke alyp kelgenim úshin keshirim suraimyn” dedi Atambaev.
Atambaev qazirgi bilikti "otbasymen basqarý jolyna tústi" dep aiyptap, odan bas tartýǵa shaqyrǵan. Eks-prezident bilik burynǵy Prezident Qurmanbek Bakievtiń izin qaitalap, ózin synaǵan azamattardy qýdalap jatyr dep aitqan.
"Qazir tipti balalarǵa da tiisetin boldy. Bul bilik odan da qorqynyshty - olar qorqytý úshin bárin túrmege otyrǵyzyp jatyr" degen Atambaev.
Dál osy kúni Aqsy aýdanyndaǵy eske alý sharasynda sóilegen Qyrǵyzstannyń qazirgi Prezidenti Sooronbai Jeenbekov "biliktegi tamyr-tanystyqpen kúresken azamat retinde" eshqashan "otbasymen basqarý júiesine" jol bermeitinin aityp, ózine deiingilerdi synaǵan.
"Bir kezderi memleketti qylmystyq top basqarǵan kezder boldy. Oǵan qoǵamnyń ózi de kóz jetkizip keledi. Biz halyqtyń arman-muratyn jaqsy bilemiz. Halyq bekerden-beker "Týra bide týǵan joq, týrasyz bide iman joq" dep aitpaǵan. Menen bastap biliktiń úsh tarmaǵy muny umytpaýy kerek. Otbasylyq klanmen kúreskenderdiń aldyńǵy qatarynda bolǵan azamat retinde aitarym, eshqashan otbasymen basqarýǵa jol bermeimin" dep aitqan.
Qyrǵyzstanda burynǵy prezident Atambaev pen qazirgi Prezident Jeenbekov arasyndaǵy jaǵdaidyń nasharlap ketkeni jii aitylady. 2018 jyldyń aiaǵynda Atambaev jergilikti saittardyń birine bergen suhbatynda prezident bireýler arqyly "ózine yqpal etýge tyrysyp otyr" dep aiyptaǵan.
Sooronbai Jeenbekov 2017 jyly Prezident sailaýynda sailaýshylardyń 54 paiyzyn jinap, jeńiske jetken. Ony prezidenttikke Qyrǵyzstannyń sotsial-demokratiialyq partiiasy usynǵan. Sol kezde Prezident bolyp turǵan Almazbek Atambaev ony erekshe qoldaǵan.
2002 jyly naýryzdyń 17-inde bilikke narazylyq bildirip, beibit sherýge shyqqandarǵa militsiia qarý qoldanǵan. Oqiǵa saldarynan alty azamat qaza tapqan, ondaǵan adam zardap shekken.
