قىرعىزستاننىڭ بۇرىنعى باسشىسى المازبەك اتامباەۆ بۇل پٸكٸرٸن 17 ناۋرىزدا بٸشكەكتە ٶتكەن اقسى وقيعاسىندا قۇربان بولعانداردى ەسكە الۋ شاراسىندا ايتقان.
“ٶمٸر بويى وتباسىلىق اۆتوريتارلىق رەجيممەن كٷرەسە جٷرٸپ, ٸشٸن كٶرمەي, سىرتىن عانا كٶرٸپ, وسىنداي ادامدى بيلٸككە الىپ كەلگەنٸم ٷشٸن كەشٸرٸم سۇرايمىن” دەدٸ اتامباەۆ.
اتامباەۆ قازٸرگٸ بيلٸكتٸ "وتباسىمەن باسقارۋ جولىنا تٷستٸ" دەپ ايىپتاپ, ودان باس تارتۋعا شاقىرعان. ەكس-پرەزيدەنت بيلٸك بۇرىنعى پرەزيدەنت قۇرمانبەك باكيەۆتٸڭ ٸزٸن قايتالاپ, ٶزٸن سىناعان ازاماتتاردى قۋدالاپ جاتىر دەپ ايتقان.
"قازٸر تٸپتٸ بالالارعا دا تيٸسەتٸن بولدى. بۇل بيلٸك ودان دا قورقىنىشتى - ولار قورقىتۋ ٷشٸن بەرٸن تٷرمەگە وتىرعىزىپ جاتىر" دەگەن اتامباەۆ.
دەل وسى كٷنٸ اقسى اۋدانىنداعى ەسكە الۋ شاراسىندا سٶيلەگەن قىرعىزستاننىڭ قازٸرگٸ پرەزيدەنتٸ سوورونباي جەەنبەكوۆ "بيلٸكتەگٸ تامىر-تانىستىقپەن كٷرەسكەن ازامات رەتٸندە" ەشقاشان "وتباسىمەن باسقارۋ جٷيەسٸنە" جول بەرمەيتٸنٸن ايتىپ, ٶزٸنە دەيٸنگٸلەردٸ سىناعان.
"بٸر كەزدەرٸ مەملەكەتتٸ قىلمىستىق توپ باسقارعان كەزدەر بولدى. وعان قوعامنىڭ ٶزٸ دە كٶز جەتكٸزٸپ كەلەدٸ. بٸز حالىقتىڭ ارمان-مۇراتىن جاقسى بٸلەمٸز. حالىق بەكەردەن-بەكەر "تۋرا بيدە تۋعان جوق, تۋراسىز بيدە يمان جوق" دەپ ايتپاعان. مەنەن باستاپ بيلٸكتٸڭ ٷش تارماعى مۇنى ۇمىتپاۋى كەرەك. وتباسىلىق كلانمەن كٷرەسكەندەردٸڭ الدىڭعى قاتارىندا بولعان ازامات رەتٸندە ايتارىم, ەشقاشان وتباسىمەن باسقارۋعا جول بەرمەيمٸن" دەپ ايتقان.
قىرعىزستاندا بۇرىنعى پرەزيدەنت اتامباەۆ پەن قازٸرگٸ پرەزيدەنت جەەنبەكوۆ اراسىنداعى جاعدايدىڭ ناشارلاپ كەتكەنٸ جيٸ ايتىلادى. 2018 جىلدىڭ اياعىندا اتامباەۆ جەرگٸلٸكتٸ سايتتاردىڭ بٸرٸنە بەرگەن سۇحباتىندا پرەزيدەنت بٸرەۋلەر ارقىلى "ٶزٸنە ىقپال ەتۋگە تىرىسىپ وتىر" دەپ ايىپتاعان.
سوورونباي جەەنبەكوۆ 2017 جىلى پرەزيدەنت سايلاۋىندا سايلاۋشىلاردىڭ 54 پايىزىن جيناپ, جەڭٸسكە جەتكەن. ونى پرەزيدەنتتٸككە قىرعىزستاننىڭ سوتسيال-دەموكراتييالىق پارتيياسى ۇسىنعان. سول كەزدە پرەزيدەنت بولىپ تۇرعان المازبەك اتامباەۆ ونى ەرەكشە قولداعان.
2002 جىلى ناۋرىزدىڭ 17-ٸندە بيلٸككە نارازىلىق بٸلدٸرٸپ, بەيبٸت شەرۋگە شىققاندارعا ميليتسييا قارۋ قولدانعان. وقيعا سالدارىنان التى ازامات قازا تاپقان, ونداعان ادام زارداپ شەككەن.
