Qyrǵyzstan prezidenti Almazbek Atambaev prezidenttiń áleýmettik qorǵaý jáne qoldaý qorynan Qazaqstanmen shekarada ótkizýdi kútip jatqan júk tasymaldaýshylardy tamaqtandyrýǵa bir million som (shamamen 14 myń dollar) bólgizdi, dep habarlaidy "Ult aqparat" Azattyqqa silteme jasap.
Qyrǵyz prezidentiniń baspasóz qyzmeti Atambaevtyń atalǵan kómek qarjyny bólý týraly jarlyqty "shekaradaǵy jaǵdaidy jáne aýa-raiynyń salqyndaitynyn eskerip" shyǵarǵanyn aitady.
10 qazannan bastap eki el shekarasynda tekserý kúsheitilip, Qazaqstanǵa ótetin adamdar men kólikter kezegi paida bolǵan. Tekserýdiń kúsheitilýinen eń aldymen tez buzylatyn azyq-túlik tasityn úlken júk kólikteriniń júrgizýshileri zardap shegip jatyr.
18 qazanda Astanada ótken kelissózder barysynda eki eldiń úkimet jetekshileri kelesi kúnnen bastap jolaýshy kólikteri men júgi bar adamdardy shekaradan ótkizýdi jeńildetý týraly ýaǵdalasqan. Biraq júk kólikteriniń júrgizýshileri jaǵdai áli ózgermegenin, Qazaqstan jaǵynyń tekserý men ótkizýdi kidirtip, burynǵydai shekarada táýliktep kezek kútip jatqanyn aitady.
