Qyrǵyz prezidenti Almazbek Atambaev "qazaq-qyrǵyz shekarasyndaǵy keiingi oqiǵalar Qytai-Qyrǵyzstan-Ózbekstan temirjol jelisin jedel arada jobalap, salý qajettigin kórsetti" dep málimdedi. Qyrǵyz lideri "keiingi oqiǵalardyń Eýraziia ekonomikalyq odaǵynan kóp úmit kútpeý kerek ekenin de ańǵartqanyn" aitty.
EAEO-NY SYNAP, RESEIDI MAQTAÝ
Qyrǵyzstan prezidenti 2017 jyly qazannyń 27-si kúni Bishkekte sheteldik elshilerdiń senim gramotalaryn qabyldady. Osy jiynda sóilegen ol áýeli Eýraziia ekonomika odaǵyn (EAEO) synap, qazaq-qyrǵyz shekarasyndaǵy keiingi oqiǵalar "EAEO-ǵa tym úlken úmit artýdyń qajeti shamaly ekenin kórsetti" dep málimdedi.
- Mine osy oqiǵalar bizge ekonomikalyq damý turǵysynan EAEO-ǵa tym úlken úmit artýdyń qajeti shamaly ekenin, ózimizdi aldamaýymyz kerek ekenin kórsetti. Óitkeni, bir adam oiyna kelgenin jasaityn odaqqa, tipti ol adam álemdegi eń uly adam bolǵan kúnniń ózinde ondai odaqqa senýge bolmaidy, - dedi Atambaev elshiler aldynda.
Qyrǵyz prezidenti "kez kelgen odaq elder arasynda jasalǵan sharttarǵa baǵynýy kerek" dedi. Almazbek Atambaev "sondyqtan, Qyrǵyzstan úkimetine aýyl sharýashylyǵy ónimderin ótkizetin balama naryqtar máselesin jedel sheshýdi tapsyratynyn" málimdedi.
- Álbette, alystan izdeýdiń qajeti joq. Bul - 32 million halqy bar Ózbekstan men bir jarym milliard adam turatyn Qytai. Al ónerkásip taýarlaryna qatysty aitsam, úkimet pen kásipkerlerge budan ary ónerkásip taýarlaryn Reseige plomba salynǵan temirjol vagondarymen jóneltýge keńes beremin. Óitkeni, Resei prezidenti, qurmetti Vladimir Pýtinmen aramyzda sondai kelisim bolǵan, - dedi Atambaev.
Almazbek Atambaev Qyrǵyzstannyń strategiialyq ári senimdi áriptesi "baýyrlas Resei" bolyp kelgenin, budan ary da solai bolatynyn aitty.
"QYTAIDAN ÚNDI MUHITYNA DEIIN"
Munan soń Qyrǵyzstan prezidenti "qazaq-qyrǵyz shekarasyndaǵy keiingi oqiǵalardyń Qytai-Qyrǵyzstan-Ózbekstan temirjol jelisin jedel jobalap, salý qajettigin kórsetkenin" aitty.
- Bir jamanshylyqtyń bir jaqsylyǵy bar degen. Qyrǵyz-qazaq shekarasyndaǵy keiingi oqiǵalar Qytai-Qyrǵyzstan-Ózbekstan temirjolyn jedel jobalap, salý qajettigin kórsetti, - dedi Atambaev. Onyń sózine qaraǵanda, "Ary qarai bul jol Túrkimenstan men Irandy basyp ótip, Arab teńizi men Úndi muhityna shyǵady".
Qyrǵyzstan prezidenti Almazbek Atambaev qyrǵyz úkimetine temirjoldy jobalaý maqsatynda qurylyp úlgergen qyrǵyz-qytai kásipornyn jeńildikpen nesielendirý máselesin qarastyrýdy eskertti.
Atambaev bul úshin Qytai jáne Qyrǵyzstannyń birlesken kásipornyn qurýǵa keńes berdi. Qyrǵyz prezidenti oǵan Ózbekstan usynatyn mekemelerdi de qosý jóninde aityp:
- Ashyq aitaiyn, Ózbekstan prezidenti Shavkat Mirziiaevpen ondai kelisim bar. Táýelsizdikti qorǵaý kerek. Biz qaǵaz júzindegi respýblika emespiz, biz táýelsiz Qyrǵyzstanbyz, - dedi.
