Qazaqstan halqy Assambleiasynyń XXV sessiiasynda sóz sóilegen Memleket basshysy Nursultan Nazarbaev sananyń jańǵyrýyna qatysty óz oilaryn jetkizip, bolashaqta Qazaqstan azamatynyń qandai bolatynyn boljap kórdi, dep habarlaidy QazAqparat tilshisi.
Prezidenttiń aitýynsha, búginde memleket pen ekonomika ǵana emes, adamnyń ózi de básekege qabiletti bolýy qajet. Al básekege qabiletti bolý úshin tek kompiýterlik saýattylyq ǵana emes, til bilimi de kerek. «Sosyn álemde bolyp jatqan ózgeristerdi qabyldaý úshin, basqa halyqtar men mádenietterdi túsiný úshin sananyń ashyqtyǵy qajet. Oǵan Qazaqstan halqy Assambleiasy úirete alady. Seniń janyńda otyrǵan adamdy syilaý qajet, onyń mádenietin, ádet-ǵurpyn, tilin qurmettegen jón. Iá, ol adam saǵan unamaýy múmkin. Alaida osy shydamdylyqtyń arqasynda bir memleketti emes, tutas álemdi saqtap qalýǵa bolady. Ondai dárejege tek bilimdi adam ǵana jete alady», - deidi N.Nazarbaev.
Prezidenttiń aitýynsha, básekege qabiletti adam pragmatik bolýy tiis. Qolynan keletin isti óndirgeni durys, naqty bir maqsatqa umtylǵany jón. Osy oraida Memleket basshysy burynǵy ata-babalarymyzdy mysalǵa keltirdi. «Bizdiń ata-babalarymyz qara jumys istedi, mal baqty, etik tikti. Bárin únemdi túrde jasady. Shikizatty únemdedi. Olar naǵyz pragmatik boldy. Qazirgi ómir sony talap etip otyr. Bolashaq Qazaqstan azamaty úshin bilim birinshi orynda turýy tiis. Men bilemin, búginde biz, ata-analar, óz balalarmyzǵa ozyq bilim berýge tyrysamyz. Ol óte durys. Sebebi aldaǵy ózgeristerge daiyn bolý qajet. Bolashaqta qazirgi mamandyqtardyń 50 protsenti qajetsiz bolady. Sonyń ornyna robottar keledi, 3D printerler jumys isteidi. Qazaqstan azamattary sondai jaǵdaiǵa beiimdelip, mamandyqtaryn aýystyra bilýi tiis. Ondaida bilim qajet bolady», - dep atap kórsetti Elbasy.
Aita keteiik, budan bólek Prezident memlekettiń damýyna kedergi jasaityn máseleler tóńireginde oi órbitti.
.jpeg)