Túrkistanda izdestirilip jatqan azamatshany ózin taksist retinde tanystyrǵan jigit aiýandyqpen óltirgen. Marqumnyń týystary osylai málimdep, kúdiktini úsh birdei qylmystyq is boiynsha jaýapqa tartýdy talap etti. Bul týraly Otyrar.kz habarlady.
Jumabekovter otbasy qaiǵydan qan jutyp otyr. Eki apta buryn úiinen aman esen shyǵyp ketken qyzdarynyń óli denesin taýyp, jer qoinyna tapsyrǵan. Sumdyq jaǵdai, osydan eki apta buryn bolǵan. Qyzdary Aigerim Tasbolatova Túrkistandaǵy ortalyqta ornalasqan bankomattan anasy men ákesiniń jalaqysyn alǵan eken. Muny baiqaǵan qaskói qomaqty qarjy alǵan azamatshany kóligine aldap mingizip, kópshilikten tys jerde ony qinap óltiripti.
"Denesin Dostyq aýylynyń shetinen tapqan. Qyzymnyń máiitin ózim kórdim. Aiýandyqpen uryp óltirgen. Adamshoshyrlyq kúide. Bet aýzy kógerip ketken. Qyzymdy áreń degende tanydym. Bet álpeti múldem kórinbeidi", - deidi marqumnyń ákesi Jaqsylyq Jumabekov.
Basylym málimetinshe, Aigerim Tasbolatovaǵa týysqandary osy jyldyń altynshy qańtary kúni izdeý salǵan. IIB aryzdanyp, tipti prokýratýra qyzmetkerlerinen kómek surapty. Arada bir jeti ótkende politseiler Túrkistan qalasyndaǵy saýda ortalyqtarynyń birinen qyzdyń uialy telefonyn tabady. Sóitse telefondy satýshyǵa taksist jigit arzan baǵaǵa satyp ketken eken. Biraq satýshy Aigerimniń uialy telefonyn ustap júrgen jigitti sýretke túsirip alǵan. Osy sýrettiń arqasynda qandy qylmys jasady degen kúdikti birden ustalyp, qamaýǵa alynǵan.
OQO IID baspasóz qyzmetiniń málimetinshe, kúdikti qazir qamaýda. Sotqa deiingi tergeý amaldary júrgizilip jatyr. Boijetkendi aiýandyqpen óltirdi degen azamat eki aptadan keiin qylmysyn moiyndap, máiitti ózi taýyp bergen. Muny quzyrly organ ókilderi de rastap otyr.
"Saraptama taǵaiyndaldy. Osy is boiynsha 1992 jylǵy jergilikti turǵyn ustaldy. Marqum qyzdyń ata-anasy 11 qańtar kúni aryzdanǵan. Al kúdiktiniń ózi eki aptadan keiin ustalyp otyr", - dep habarlady OQO IID baspasóz qyzmetiniń jetekshisi Saltanat Qaragózova.
Jumabekovtar otbasy qyzdaryn óltirgen azamat zań aldynda birneshe is boiynsha jaýap bersin dep talap etýde. Óitkeni kúdikti qyzdyń uialy telefony men aqshasyn qoldy etip, keiin ony zorlap óltirdi deidi. Biraq boijetkenniń zorlyq kórgenin rastaý úshin saraptama jumystarynyń qorytyndysy qajet.
