QR DSM Qoǵamdyq densaýlyq saqtaý ulttyq ortalyǵy mektepke balany qalai daiyndaý kerektigi jóninde ata-analarǵa keńes berdi, dep habarlaidy "Ult aqparat".
Balańyzdyń barlyq qajetti ekpeler alýyn tekserińiz
Profilaktikalyq ekpe egý kúntizbesi balalardy juqpaly aýrýlardan tiimdi qorǵaý úshin vaktsina salýǵa ońtaily ýaqytty anyqtaidy. Balanyń ýaqytyly ekpe alýy mańyzdy. Aǵzada vaktsinaǵa qarsylyq bolmaǵan jaǵdaida, dárigerdiń tekserýinen keiin jasyna sáikes barlyq qajetti ekpelerdi saldyrtqan jón.
Mektepke qajetti kiim-keshekter satyp alyńyz
Mektep kiimi men quraldaryna qoiylatyn naqty talaptar bar ekendigin bilesiz be? Mysaly, qaýipsiz ári sapaly mektep portfeliniń salmaǵy 1 kg aspaýy qajet, onyń ortopediialyq arqalyǵy men jaryq bóletin elementteri bolýy kerek. Bir oqý kúnine eseptelgen barlyq kitaptardyń jalpy salmaǵy qural-saimandarymen birge sómkeniń salmaǵyn eskermegende: I–II synypta — 1,5–2,0 kg; III–IV synypta — 2,0–2,3 kg; V–VI synypta — 2,3–3,0 kg; VII–VIII synypta — 3,0–3,5 kg; IX–XII synypta — 3,5–4,5 kg aspaýy tiis. Mektep formasy balanyń qozǵalysyn shektemeitinine jáne jyl mezgiline sai keletinine nazar aýdaryńyz.
Balanyń jumys ornyna kóńil bólińiz
Balanyń densaýlyǵy jaqsy bolý úshin, ol qolaily jaǵdaida oqýy kerek. Balanyń jumys orny jaryq bolýy tiis, sham sol jaq bólikte, eger balańyz solaqai bolsa – oń jaqta ornalasýy kerek. Ústeldiń biiktigi balanyń boiyna sáikes bolýy qajet, boiy 120 santimetr bolǵan jaǵdaida – ústeliniń biiktigi 52 santimetrden aspaýy kerek, al boiy 120 santimetrden asqan jaǵdaida – 60 santimetr bolýy kerek.
Balany gigiena saqtaýǵa úiretińiz
Tamaq isher aldynda jáne dárethanadan keiin qoldy jýý – balany kóptegen aýrýlardan qorǵaityn eń qarapaiym ereje.
Balany kún tártibin saqtaýǵa úiretińiz
Kún tártibi — bul kez-kelgen balanyń salaýatty ómir saltynyń mańyzdy bóligi. Mektep jasyndaǵy balaǵa durys uiqy rejimi jáne turaqty úilestirilgen tamaqtaný rejimi qajet. Oqýshylarǵa arnalǵan túngi uiqynyń normasy: 1-4 synypta – 10-10,5 saǵat, 5-7 synypta – 9,5-10 saǵat, 8-9 synypta – 9-9,5 saǵat, 10-11 synypta – 8-9 saǵat. Birinshi synyp oqýshylary kúndiz 2 saǵattai ýaqyt uiyqtap alý qajet. Mektep jasynda tórt ret tamaqtanǵan jón, ár 4 saǵat saiyn táýliktik ratsiondy birdei bólip tamaqtaný qajet: tańǵy as – 25%, ekinshi tańǵy as – 20%, túski as – 35%, keshki as – 20%.
Psihologiialyq turǵydan daiyn bolyńyz
Psihologiialyq jailylyq balalar úshin de, ata-analar úshin de mańyzdy. 1 qyrkúiekti kúizelissiz qarsy alyńyz. Tynyshtyq saqtap, mektepke ázir bolyńyz!
Jalpy, bul qarapaiym erejelerden bólek, eń bastysyn umytpańyz – balańyzdy kóbirek baýyryńyzǵa basyp, qushaqtańyz. Bul olarǵa qorǵanysh sezimi men senimdilik beredi. Balalar olardy jaqsy kóretinin, túsinetinin, qoldaitynyn bilip sezetin bolady. Balańyzdy olardyń akademiialyq jeńisterine qaramastan jaqsy kórińiz.
