Ata-analardan kez kelgen jaǵdaida aqsha jinaý — zańsyz. Bul týraly bilim salasyndaǵy qyzmetterdiń sapasyn kóterý máseleleri talqylanǵan jiynda Memlekettik qyzmet isteri jáne sybailas jemqorlyqqa qarsy is-qimyl agenttigi tóraǵasynyń orynbasary Oljas Bektenov aitty, dep habarlaidy Sputnik.
"Astanada aqpan aiynan bastap agenttik pen qalalyq ákimdiktiń birlesken "Astana – adaldyq alańy" jobasy iske asyrylyp jatyr. Onyń jumysy jobalyq menedjment qaǵidalaryna negizdelgen", — dep atap ótti Bektenov.
Onyń aitýynsha, joba aiasynda bilim salasyna júrgizilgen taldaý nátijesinde birqatar olqylyq anyqtalyp, naqty usynystar daiyndaldy.
"Mektepterdegi aqsha jinaý máselesin erekshe aityp ótkim keledi. Ókinishke qarai, bul úirenshikti dúniege ainalyp otyr. Ata-analardyń kópshiligi oǵan kóndigip, solai bolýy tiis dep oilaidy. Biraq olai emes. Memleket mekteptiń búkil qajettiligine jetkilikti mólsherde qarajat bóledi, onyń ishinde jóndeý jumystary men basqa da sharalar bar.
Ata-analardan kez kelgen formada aqsha jinaý zańsyz. Bul balabaqshalarǵa da qatysty", — dedi tóraǵa orynbasary.
Ol memlekettik organdarǵa barlyq usynysty eskerip, máseleni sheshý úshin belsendi jumys isteý qajettigin aitty.
"Astana – adaldyq alańy" jobasynyń jetekshisi Jazira Jylqyshieva Astana mektepterinde bul másele ótkir turǵanyn jetkizdi. Áli kúnge deiin balabaqshaǵa barý úshin "qosymsha" aqsha tóleý kerek. Keibir kolledjder órt qaýipsizdigi normalaryna jaýap bermeidi. Jóndeý jumystary oqýshylar men stýdentterdiń esebinen júrgiziledi.
Agenttiktiń baspasóz qyzmeti habarlaǵandai, budan bólek, otyrysta bilim berý mekemelerin reformalaý máselesi talqylandy, bul jumystyń nátijesinde muǵalimder men balabaqsha tárbieshileriniń jalaqysyn kóterý múmkin bolady. Biýdjetten qosymsha qarjy bólmei-aq, oqýshylarǵa jaǵdai jasaý jaǵy jaqsarady, degen senimde jiynǵa qatysýshylar.
