Aqmola oblysynda oqýshylardan zańsyz aqsha jinaǵan bilim qyzmetkerleri jaýapkershilikke tartyldy, dep habarlaidy "Ult aqparat".
QR Sybailas jemqorlyqqa qarsy is-qimy agenttiginiń Aqmola oblysy boiynsha departamentinen málim etkendei, biyl 1424 Call-ortalyǵyna óńir turǵyndarynan 20-dan astam qońyraý túsken. Olardyń arasynda bilim berý mekemelerinde zańsyz aqsha jinaýǵa qatysty máseleler de bar.
Máselen, Atbasar qalasynyń ártúrli mektebinde bilim alatyn oqýshylardyń ata-analarynan oqý oryndarynyń qajettiligine aqsha jinalǵanyna qatysty aryz túsken. Osyǵan sáikes, Sybailas jemqorlyqqa qarsy is-qimyl departamenti janyndaǵy arnaiy monitoringilik top pen oblystyq Bilim basqarmasy kóshpeli qyzmettik tekserý júrgizgen.
330-ǵa jýyq ata-anadan anonimdi saýalnama alynǵan.
«Tekserý nátijeleri boiynsha qala mektepteriniń túrli qajettilikteri úshin zańsyz aqsha jinaý faktileri anyqtaldy», - dedi departamentten.
Sondai-aq osyǵan uqsas faktiler Stepnogorsk qalasynyń bilim berý salasynyń qyzmetkerlerine qatysty qyzmettik tekserý barysynda da anyqtalǵan.
Nátijesinde, Atbasar aýdanynyń jáne Stepnogorsk qalasynyń bilim bólimderiniń basshylary, mektep direktorlary tártiptik jaýapkershilikke tartyldy.
«Osyndai quqyq buzýshylyqtarǵa jol bermeý maqsatynda oblystyń bilim berý mekemeleriniń basshylyǵymen túsindirý kezdesýi ótkizildi», - dep qosty vedomstvodan.
