Qaraǵandy oblysynda asyrandy balalarǵa qatygezdik kórsetti dep aiyptalǵan erli-zaiyptylar men olardyń qyzyna qatysty sot úkimi jariialandy. Is mamandandyrylǵan aýdanaralyq kámeletke tolmaǵandar isteri jónindegi sotta qaraldy, dep habarlaidy ult.kz.
Tergeý nusqasyna sáikes, Qarqaraly aýdanynda turatyn pedagogtar otbasy balalar úiinen patronattyq tárbiege alǵan alty balany birneshe jyl boiy júieli túrde qorlaǵan. Aiyptaý tarapy olardyń balalardy aýyr jumysqa jekkenin, uryp-soqqanyn, qorlaǵanyn jáne ashtyqta ustaǵanyn málimdedi.
Sot barysynda balalardyń bolmashy qatelikteri úshin jazalanǵany, kei jaǵdaida adam tózgisiz jaǵdailarǵa tap bolǵany týraly derekter aityldy. Saraptama qorytyndylary jábirlenýshilerdiń denelerinde kóptegen jaraqat izderi bolǵanyn kórsetti.
Prokýrordyń aitýynsha, kámeletke tolmaǵandardyń aiǵaqtary sot-psihologiialyq saraptama nátijelerimen rastalǵan. Sarapshylar oqiǵalardan keiin balalardyń birinde psihikalyq buzylystardyń damyǵanyn anyqtaǵan.
Al qorǵaý tarapy tergeý barysynda zańbuzýshylyqtarǵa jol berilgenin alǵa tartty. Otbasy basshysy óz kinásin moiyndamai, balalarǵa jaqsy qaraǵanyn jáne tergeý kezinde qysym kórgenin málimdedi.
Is materialdaryn zerttegen sot otbasy múshelerin kináli dep tanydy. Otbasy basshysy 12 jylǵa, jubaiy 10 jylǵa, al qyzdary 4 jyl 8 aiǵa bas bostandyǵynan aiyryldy.
Sonymen qatar sot árbir jábirlenýshiniń paidasyna moraldyq shyǵyn retinde 10 million teńgeden óndirip berý týraly sheshim shyǵardy.
Úkim ázirge zańdy kúshine engen joq. Qorǵaýshylar apelliatsiialyq shaǵym túsiretinderin málimdedi.
