Rigada 15-shi qabattan qulap ketken Asylbek Mýsin qaitys bolardyń aldynda birneshe ai buryn týra osylai onyń jary baqilyq bolǵan. Oqiǵa 22 tamyzda dál sol Riga qalasynyń batys bóliginde ornalasqan Imante aýdanyndaǵy kópqabatty úide bolǵan. Bul týraly málimetti latviialyq LTV7 telearnasynyń "Búgin keshke" baǵdarlamasynyń tilshileri anyqtaǵan.
"Onyń jary da osylaisha qaitys boldy. Ol depressiiada boldy... Terezeden sekirip ketti. Ol ózin kinálady, sosyn depressiiaǵa tústi, sońynda shydai almaǵan sekildi. Ol bireýge kedergi keltiretindei saiasi figýra bolǵan joq", - dedi telearnaǵa qazaqstandyq saiasatker Talǵat Qaliev.
Eske salaiyq, 27 jeltoqsanda Latviia astanasy Rigada Qazaqstan Prezidenti Ákimshiliginiń eks-jetekshisi Aslan Mýsinniń uly - Asylbek Mýsin qaitys bolǵany habarlanǵan bolatyn. Oqiǵa 22-nen 23 jeltoqsanǵa qaraǵan túni bolǵan. Is 22 jeltoqsan saǵat 23:42-de politsiiada tirkeldi. Politseilerdiń aqparaty boiynsha, marqum 15-qabattan qulaǵan. Asylbek Mýsin Qazaqstan elshiliginiń konsýldyq tirkeýinde bolmaǵan. Kei málimetter boiynsha, onyń elde turýyna yqtiiar haty bolǵan.
"Qulaǵan sáttiń kýágeri joq. Onyń denesin kezdeisoq ótip bara jatqan adam tapqan. Politsiia kelgen sátte ǵana, úi turǵyndary syrtqa shyǵyp ne bolǵanyn bilgisi kelgen", - dedi politsiia ókili Oskars Chýgýnovs.
Politsiiany shaqyrǵan er adam suhbat berýden bas tartty, alaida ólgen adamnyń kim ekenin anyqtaýǵa úidiń aýlasyn tazalaýshy Vladimir esimdi azamattyń kómekteskeni anyqtaldy. "Biz sóilesken joqpyz, tek "sálemetsiz be, qaiyrly tań" - bar bolǵany osy. Biz onymen jumada tanystyq, men onyń esimin bildim. Juma kúni ol qulady", - dedi Vladimir.
Telearna málimetinshe, Asylbek Mýsinniń otbasy Rigaǵa birneshe jyl buryn kelgen.
Tergeýshiler ártúrli nusqa boiynsha tekseris ótkizedi, biraq eń basty nusqa "ózin ózi óltirý" dep sanaidy. Mýsinniń ólimine qatysty qylmystyq is qozǵaldy, tergeý júrip jatyr. Beiresmi málimet boiynsha, onyń úsh balasy artynda qalǵan.
Eske salaiyq, Asylbek Mýsin terezeden qulap ketken. Bul týraly Qazaqstannyń Syrtqy ister ministrligi málimdedi.
"Qazaqstan azamatynyń Rigada kóz jumý deregine qatysty qylmystyq is qozǵaldy. Ólim sebebin anyqtaýǵa baǵyttalǵan tergeý bastalǵan. Keshe marqumnyń aǵasy Rigaǵa kelip, konsýlmen birge sot-meditsinalyq saraptama ortalyǵynda boldy. Ol jerde aǵasy kóz jumǵan Asylbek Mýsin ekenin rastady", - deidi SIM baspasóz qyzmetiniń jetekshisi Ánýar Jainaqov.
Asylbek Mýsinniń ákesi Aslan Mýsin 2008-2012 jyldary Qazaqstan Prezidenti Ákimshiligin basqarǵan.
Al 2014 jyldyń naýryzynda Aslan Mýsin Qazaqstannyń Horvatiiadaǵy elshisi bolyp taǵaiyndaldy. Biraq 2017 jyldyń qańtarynda zeinet jasyna kelýine bailanysty bul qyzmetten bosatylǵan edi.
