Bir qaraǵanda bul jigittiń jyryna tán albyrttyq pen asaý sezim ańsaryn baiqaisyz. Al, tereńine úńilip, kóńil zerdesimen kóz salyp qarasańyz úlken taǵdyrdy kóresiz. Asyly, adamdy aqyn etetin osy taǵdyry shyǵar. Ómirin óleńge bailaǵan Aslan júrek túkpirindegi jan syryn búkpesiz jaiyp salady. Onyń qalamy sherli. Aslannyń óleńderin oqyp otyryp, janyńyzdy áldebir mazasyz muń bilep, shemendi áýenine qosyla yńyldaǵyńyz keledi. Qart Kaspiidiń jaǵasynda ósken jastyń mańdaiyna Táńir óleń syilapty. Endeshe, onyń kim ekenin taǵdyrly óleńderi aitsyn.
Jandarbek Jumaǵulov
MASKÚNEM
Kózimdei meniń
Qyzaryp baryp jumylatuǵyn
Kún bara jatyr uiyqtap.
Sezimdei kerim
Sezimsizderge urynatuǵyn
Ai nuryn shashar iip naq.
Al, sosyn kórer
Bir meiirimge zaryqqan jannyń
Túskenin ashy aidynǵa.
Jan dosym keler
jarty bailyǵyn jaryq jalǵannyń
Qyzdai məpelep qoinynda.
Kirjiip turyp
Quiar sharabyn, kúmiljir bul bir
Sózderdiń aityp ərbirin.
Yrjiyp kúlip
Aitar myrtyqtyń bulyńǵyr,buldyr
Qyzǵa súikimsiz taǵdyryn.
Aiap rasynda...
Tań atar sonsoń qimaǵan ony
Kózimdei meniń ashylyp.
Aiaq astynda
Men úshin bireý jinap alady
Aqylyn jatqan shashylyp.
Arnaǵan bolyp
Dinge ǵumyryn júmilə kólgir
Jynjailaq bolǵan júregi
Alladan qoryq
desem. burylyp, kúmirə bolǵyr
Saitan túrtkendei kúledi.
Erigimdi alyp
Tursa da qansha arasyn bólgen
Abyl, Qabyldyń muń, kúmən,
Ómirim jaryq
Kələm kóshinde adasyp ólgen
Ertekshi shaldyń ǵumyrynan!
BEIIT BASYNDAǴY BÁIIT
Dál osynaý kezge deiin
Qaldyryppyn umyt kóp.
Áke, happy birthday to you,
Qutty bolsyn qyryq tórt!
Kelem neken-saiaq tym,á,
Perzentińdi keshe gór!
Umytyppyn aiatty da –
Saýabyńdy eseler.
Nanǵa berdim keshe túgel,
Sen dep aqsha jinap em.
Turshy, qane, esesine –
Jyr ákeldim syiǵa men.
Qarashy, áke, kórden shyǵyp,
Kese ustaǵan qolymdy.
Anam jasyn bergen syǵyp,
Qandyrsyn dep shólińdi...
Namys soryp, talmap ardy,
Júrmiz, áiteý, jan baǵyp.
Men jolyńdy jalǵaǵam-dy,
Saparlarǵa qamdanyp.
Joq!
Muńaima!
Qanshama áli
Jasymaqpyz, o toba!?
Jel de búgin án salady
Eń kóńildi notada.
Sárýarym, dilim – bútin,
Iesi sen bul kúnniń!
Jáne de,áke, búgingi tún –
Qadir túni Rýhymnyń.
Dál osynaý kezge deiin
Qaldyryppyn umyt kóp.
Áke, happy birthday to you,
Qutty bolsyn qyryq tórt!
Alastaý
"Jan tońdyrǵan aqpannyń ketken lebi, -
Kúntizbem - keldi, alaqai, kóktem",-dedi.
Qarasam Qys-Diiý tur kiip alyp
Hor qyzyna uqsaityn betperdeni.
Sekildi babasynan mura qalǵan,
Tipti de ketkisi joq myna mańnan.
Áiteýir, qoiandarǵa ǵana pana
Tósiniń júni aǵarǵan.
Qarǵa máz kóp kórgen soń ólekseni,
Basqa eshkim joq súietin erekshe ony.
Qarlyǵash qaitpady áli,
Qarǵalardan
múlde onyń bólek baǵy, bólek sory.
Aiaz deitin shaldýar buzyq kelip,
Ámirin qystyń jipke tizip, tónip
jatqanynda
Bult artyna tyǵylyp Kún tur, áne,
Syǵalaidy ár tesikten qyzyq kórip.
Dámesi bar ujymaq - jasyl baqtan,
Áýeli artyn jappai, basyn japqan -
Aqqala-molda ýaǵyz aitady-ai kep,
Aitatyny - Alla emes, ashýly aqpan.
Kóńilim kók muz bolyp ketken tegi,
Bir eritse, eriter kóktem demi.
Kúntizbem keshirmeidi muny esitse,
Bar, bara ǵoi Qys-Diiý betperdeli!..
Angedoniia
(Edilbek Dúisenge)
Janymyzdy jalǵannyń sheri kómdi,
Toryqtyq ulaǵatsyz ulylyqtan.
Ei, neme, saitannyń da syryn uqqan
Sen - aqynsyń!
Uǵyp kór meni de endi:
Kəriptiń keipine engen kəzzaptarǵa
Biikten alasaryp,
Túidek-túidek sózderden qala salyp,
Jaiyp tastap kóńlimdi alasha ǵyp,
Taqymynan tabylyp týlaq bolyp,
Kókiregime jasyryp túndi ap kelip,
Úmit murjasynyń tóbesine shyǵyp oinap
Býdaq ta býdaq, býdaq bolyp
San kúdik,
Ata tekti asaý aiǵyrlardy əńgi ǵyp,
Aq denesinde tittei meń de joq adaldardy zəńgi ǵyp;
Jyrǵap, tolyp...
Bolmysymda qalmai bir symbat, kórik;
Qýyrdaq qyp júrekti týrap berip
Məńgirip,
Bir aýyz sózimenen aspandy da kúńirentken dýaipat kúshke taǵyp min,
Jalyqtym.
(Shildede tonǵan kún qursyn!)
* * *
Júregimnen jalqy nur kóshken edi
Ańsap ótkendi...
Men saǵynyp otyrmyn eshteńeni
jəne kóktemdi...
Arǵy jaq pa?
Jo-oq, onda basqa bəigi
(Órtený - sezimge emes),
Myna jol - baqytqa bastamaidy,
Bəri - ýaqyttyń kózindegi eles...
Armandar - zýlaǵan kólik
(Aialdap, shattyǵyn usynbady bir),
Jəiimdi suradyń ne ǵyp,
Kirpigimniń ushyndaǵy ińir
bilmeidi tózim degenniń
Əje shashynan da nəzik ekenin;
Ol tek nərsiz úmittiń bolmashy səýlesin azyq eterin.
Úmit - túgesilgen...
Mahabbat - bulttyń artynan qaraidy kekireiip.
"Ei, talaily Taǵdyrym,
shaldyqpa kúresińnen!"
Ózińe odan basqa ne tileiik?!.
Asylan Qýanyshuly 1999 jyly Mańǵystaý oblysy, Túpqaraǵan aýdanynyń ortalyǵy – Aqketik (Fort-Shevchenko) qalasynda dúniege kelgen. Ál-Farabi atyndaǵy Qazaq ulttyq ýniversiteti, Filologiia, ádebiettaný jáne álem tilderi fakýltetiniń stýdenti.
